2017 წელს საქართველოში ტურისტების რაოდენობა რეკორდული იქნება და 7 მილიონს გადააჭარბებს - ამის შესახებ ტურიზმის ეროვნული ადმინისტრაციის ხელმძღვანელმა გიორგი ჩოგოვაძემ განაცხადა.
ტურიზმის ადმინისტრაციამ შინაგან საქმეთა სამინისტროსთან ერთად ივლისის მონაცემები შეაჯამა. სტატისტიკის მიხედვით, მიმდინარე წლის ივლისში საქართველოში მილიონამდე საერთაშორისო მოგზაური შემოვიდა.
„ჩვენმა ქვეყანამ ტურისტების რაოდენობის რეკორდული ზრდა შეძლო, რომელიც ამავდროულად არა მარტო მშრალ სტატისტიკას, არამედ მეტ დასაქმებას და ჩვენი ქვეყნის ეკონომიკაში მეტ შემოსავალს ნიშნავს. დღეს ივლისი შევაჯამეთ, რომლის მიხედვითაც ტურისტების რაოდენობაში 33%-იანი მატება გვაქვს. ეს ყველაფერი გვაძლევს საშუალებას, ვივარაუდოთ, რომ 2017 წელი ტურისტების რაოდენობის თვალსაზრისით ახალი რეკორდების წელიწადი იქნება და ტურისტების რაოდენობა 7 მილიონს გადააჭარბებს. საქართველო შემოსავლების მხრივ როგორც ჩვენი მეზობელი ასევე, ევროკავშირის ქვეყნები ლიდერობენ. ასევე, ის ახალი ბაზრები, რომლებიც ჩვენ ბოლო წლების განმავლობაში აღმოვაჩინეთ და განვავითარეთ. ტოპ 15 ქვეყანა, რომელიც საქართველოში შემოდის ყველა მიმართულებით, პოზიტიური ზრდა გვაქვს. ტურისტული ნაკადების დივერსიფიკაცია მოხდა. დატვირთულია როგორც, აჭარის რეგიონი და შავი ზღვისპირა სანაპირო, ასევე ჩვენი მთიანი რეგიონები და კახეთი“ - განაცხადა გიორგი ჩოგოვაძემ.
შსს-ს საინფორმაციო ანალიტიკური დეპარტამენტის წარმომადგენელის ლია მელაძის განმარტებით, ტურისტული სეზონი აქტიურ ფაზაშია.
„შინაგან საქმეთა სამინისტროს საინფორმაციო ანალიტიკური დეპარტამენტის მონაცემებით 2017 წლის ივლისი წინა წლის ანალოგიურ პერიოდთან შედარებით ტურისტული ვიზიტების 32.9%-იანი მატებით აღინიშნა. სულ ივლისში 982,487 ვიზიტი განხორციელდა, რაც 2016 წლის ანალოგიურ პერიოდთან შედარებით 28.9%-ით მეტია. ტურისტების ყველაზე მზარდი რაოდენობა მეზობელი ქვეყნებიდან გვაქვს. ეს ქვეყნებია რუსეთი, სომხეთი, აზერბაიჯანი, თურქეთი, უკრაინა და ირანი. საქართველოში შემომსვლელთა კუთხით ევროკავშირის ქვეყნების მიმართულებით მზარდი რაოდენობაა. იანვარ-ივლისის ინტერვალში ნიდერლანდები, გერმანია, საფრანგეთი, დიდი ბრიტანეთი, პოლონეთი, ლიტვა და საბერძნეთი გამოირჩეოდნენ. ახლო აღმოსავლეთიდან - ისრაელი. შუა აზიის ქვეყნებიდან - ყაზახეთი და უზბეკეთი, ხოლო აღმოსავლეთ ევროპის ქვეყნებიდან - ბელორუსია. აღსანიშნავია ამერიკის შეერთებული შტატების მოქალაქეების 28%-იანი ზრდა“, - განაცხადა ლია მგელაძემ.