„ბავშვთა სამყაროს“ დაკავებული დირექტორის გათავისულების მოთხოვნით იუსტიციის სამინისტროსთან აქცია მიმდინარეობს. „ბავშვთა სამყაროს“ აქციონერები და მოიჯარეები გიორგი მაჭავარიანის გათავისულებას ითხოვენ. აქცია თავდაპირველად პროკურატურასთან იყო დაგეგმილი, თუმცა იმის გამო, რომ საგამოძიებო უწყებასთან დაზარალებული მოვაჭრეების ნაწილის აქცია მიმდინარეობს, შესაძლო ინციდენტების თავიდან აცილების მიზნით, აქცია იუსტიციის სამინისტროსთან ჩატარდა.
აქციის მონაწილეების განცხადებით, მაჭავარიანი უდანაშაულოა, რადგან უსაფრთხოების წესები, რასაც მას გამოძიება ედავება, დაცული იყო. „ბავშვთა სამყაროს“ აქციონერების ნაწილი აცხადებს, რომ თუ სავაჭრო ცენტრის დაწვაში მაჭავარიანია დამნაშავე, მაშინ ასეთივე დამნაშავეები ისინიც არიან. ბრალდებას, რომელიც წარდგენილი აქვს მაჭავარიანს, ისინი დაუსაბუთებლად მიიჩნევენ.
პროკურატურამ „სავაჭრო სახლი ბავშვთა სამყაროს“ დირექტორი და უსაფრთხოების სამსახურის თანამშრომელი გუშინ დააკავა.