საპარლამენტო უმრავლესობა პრეზიდენტის საპარლამენტო მდივანთან დაკავშირებით განცხადებას ავრცელებს. უმრავლესობა მოუწოდებს პრეზიდენტს, "მიიღოს ზომები, რათა შეწყდეს პარლამენტისადმი უპატივცემულო დამოკიდებულების გამოვლენა".
განცხადებაში, რომელიც ცოტახნის წინ გავრცელდა, აღნიშნულია, რომ პრეზიდენტის საპარლამენტო მდივანმა პარლამენტის რიგგარეშე სესიაზე და სესიის დასრულების შემდეგ მისი გამონათქვამებით უხეშად დაარღვია ეთიკის და კონსტიტუციურ ინსტიტუტებს შორის ურთიერთობის ნორმები.
საპარლამენტო უმრავლესობა ამ განცხადებების გამო პასუხისმგებლობას სწორედ პრეზიდენტს აკისრებს. გარდა ამისა საზოგადოებრივ მაუწყებელთან საუბარში საპარლამენტო უმრავლესობის წევრმა ლევან გოგიჩაიშვილმა არ გამორიცხა, რომ უმრავლესობამ ანა დოლიძეს ბოიკოტი გამოუცხადოს.
პრეზიდენტის ადმინისტრაცია საპარლამენტო უმრავლესობის განცხადებას ჯერ არ გამოხმაურებია. „მოამბის“ ინფორმაციით, დღის მეორე ნახევარში ადმინისტრაცია საპასუხო განცხადების გავრცელებას გეგმავს.