ვენეციის კომისია ვერ ჩაერევა კონსენსუსის მიღწევის პროცესში, ეს ქართული პოლიტიკური პარტიების გადასაწყვეტია, - ამის შესახებ საზოგადოებრივს ვენეციის კომისიის პრეზიდენტმა ჯანი ბუკიკიომ განუცხადა.
ამასთან, როგორც ჯანი ბუკიკიომ აღნიშნა, საქართველოს ვერ ექნება დემოკრატიული და ლეგიტიმური კონსტიტუცია, რომელსაც მხოლოდ ერთი მხარე დაეთანხმება.
"ჩვენ შარშან გადავწყვიტეთ, ჩამოგვეყალიბებინა ახალი საკონსტიტუციო კომისია, რომელიც ცვლილებებზე იმუშავებდა. ამ კომისიის შემადგენლობაში იყო ვენეციის კომისიაც. მინდა ვთქვა, რომ კმაყოფილი და მოხარული ვიყავით შედეგით. საკონსტიტუციო კომისიამ მნიშვნელოვანი სამუშაო შეასრულა. ასე რომ, საკონსტიტუციო ცვლილებების პროექტი, რომელიც ვენეციის კომისიას წარუდგინეს, იყო დამაკმაყოფილებელი. რა თქმა უნდა, იყო რამდენიმე რეკომენდაცია და იმედი გვქონდა, რომ პოლიტიკური პარტიები და პარლამენტი ახალ კონსტიტუციას ჩვენი რეკომენდაციების გათვალისწინებით მიიღებდა. ახლა პრობლემა შემდეგშია - საკონსტიტუციო ცვლილებების პროექტი უკვე დაამტკიცეს მეორე მოსმენით და მას მხარი დაუჭირა მხოლოდ ერთმა პარტიამ. ჩვენ დაჟინებით მოვითხოვდით, კონსტიტუცია რომ იყოს ლეგიტიმური, თქვენ უნდა მიაღწიოთ რაც შეიძლება ფართო კონსენსუსს. თქვენ ვერ გექნებათ დემოკრატიული და ლეგიტიმური კონსტიტუცია, რომელსაც მხოლოდ ერთი მხარე დაეთანხმება. სწორედ ამიტომ ვთხოვეთ ყველა პოლიტიკურ პარტიას და ძალას საქართველოში, რომ განეახლებინათ კონსტრუქციული დიალოგი, რათა მოიძებნოს კარგი გამოსავალი და კონსტიტუცია მიღებული იყოს რაც შეიძლება ფართო კონსენსუსით. ჩვენ ვთხოვეთ ყველა პოლიტიკურ პარტიას და ძალას საქართველოში, რომ განეახლებინათ კონსტრუქციული დიალოგი, რათა მოიძებნოს კარგი გამოსავალი და კონსტიტუცია მიღებული იყოს რაც შეიძლება ფართო კონსენსუსით. ამისთვის ყველა პარტია უნდა წავიდეს კომპრომისზე. ვენეციის კომისია ვერ ჩაერევა ამ პროცესში, ეს ქართული პოლიტიკური პარტიების გადასაწყვეტია", - განაცხადა ბუკიკიომ.
რაც შეეხება მოსაზრებას, საკონსტიტუციო ცვლილებების ხელახალი განხილვის შესაძლებლობის შესახებ, ბუკიკიო აცხადებს, რომ "შეუძლებელი არაფერია, თუმცა თუ ეს წესს ეწინააღმდეგება, პარლამენტი ამას ვერ გააკეთებს".
"ვფიქრობ, არაფერია შეუძლებელი, ეს დამოკიდებულია პარლამენტზე, დეპუტატებზე. თუ ეს წესს ეწინააღმდეგება, პარლამენტი ამას ვერ გააკეთებს. ჩემი პოზიცია არის ასეთი - ძალიან მნიშვნელოვანია პროცესი, რომელიც შვიდი თვის წინ დაიწყო, დასრულდეს რაც შეიძლება საუკეთესო შედეგით. ეს მნიშვნელოვანია ქვეყნისთვის, საქართველოს მოქალაქისთვის, რომ მათ ჰქონდეს დემოკრატიული კონსტიტუცია", - აღნიშნა ბუკიკიომ.
მისივე თქმით, ვენეციის კომისია მიესალმება საქართველოს მთავრობის სურვილს, გადავიდეს პროპორციულ საარჩევნო სისტემაზე, თუმცა გაკვირვება გამოიწვია, რომ ახალი საარჩევნო სისტემა ძალაში შევა მხოლოდ შვიდი წლის შემდეგ.
"ჩვენ ცოტა გაკვირვებულები დავრჩით, როდესაც გავიგეთ, რომ ახალი საარჩევნო სისტემა ძალაში შევა მხოლოდ შვიდი წლის შემდეგ. მოგეხსენებათ, შვიდი წელი ძალიან დიდი პერიოდია. მაგრამ არის დისკუსიების, დიალოგის, კომპრომისების საგანი, რათა მიღებული იყოს საუკეთესო გადაწყვეტილება. ეს ყველაფერი აუცილებელია, რომ ახალი საარჩევო სისტემა რაც შეიძლება მალე შევიდეს ძალაში, მაგრამ ეს არის უშუალოდ ქართველების განსახილველი საკითხი", - განაცხადა ბუკიკიომ.