დავით ოთხმეზურის მკვლელობის საქმეზე სააპელაციო სასამართლოში დასკვნითი სიტყვა თქვა ბრალდების მხარემ. როგორც პროკურორმა განაცხადა, მოწმეთა ჩვენებებით მტკიცდება, რომ მკვლელობა ასლან ბეჟანიძემ ჩაიდინა. საპირისპიროს ამტკიცებს დაცვის მხარე. ადვოკატის თქმით, ბრალდების მხარის დასკვნითი სიტყვითაც დამტკიცდა, რომ სახელმწიფო ბრალდებას მტკიცებულებები არ აქვს.

დღევანდელ სასამართლო პროცესს ესწრებოდა გარდაცვლილის მამა გიორგი ოთხმეზურიც. როგორც მან საზოგადოებრივთან საუბრისას განაცხადა, ის დარწმუნებულია, რომ მისი შვილი ბეჟანიძემ მოკლა.

"თავიდანვე მეუბნებოდნენ, რომ ჩემი შვილი მან მოკლა. პროკურატურამ დამნაშავე დააკავა, რომელიც საქალაქო სასამართლომ გაათავისუფლა, თუმცა, იმედი მაქვს, რომ სააპელაციო სასამართლო სწორ გადაწყვეტილებას მიიღებს",- განაცხადა ოთხმეზურმა.

პროცესს ესწრებოდა ასლან ბეჟანიძის დედაც. ის დარწმუნებულია, რომ სააპელაციო სასამართლო საქალაქოს მსგავსად, მისი შვილის მიმართ გამამართლებელ განაჩენს გამოიტანს.

"გამორიცხულია, ჩემს შვილს ვინმე მოეკლა. ის თბილისში არ ცხოვრობდა, აჭარაში ცხოვრობდა და როცა თბილისში ჩამოდიოდა, ჩემს გარეშე ვერ გადაადგილდებოდა. ჩვენ დავამტკიცებთ ჩვენს სიმართლეს",- განაცხდა თამარ მუქერიამ.

შემდეგი სასამართლო პროცესი დაცვის მხარის დასკვნითი სიტყვით განახლდება. მორიგი სხდომა სააპელაციო სასამართლოში 26 სექტემბერს ჩაინიშნა.

შეგახსენებთ, დავით ოთხმეზური 2004 წელს მოკლეს. 12 წლის შემდეგ, 2016 წელს, პროკურატურამ ასლან ბეჟანიძე დააკავა, რომელსაც წინასწარი პატირმობა შეეფარდა, თუმცა 9 თვის შემდეგ მოსამართლემ ბეჟანიძე გაათავისუფლა. საქალაქო სასამართლოს გადაწყვეტილება პროკურატურამ სააპელაციო სასამართლოში გაასაჩივრა.