სამოქალაქო მოძრაობა „ძალა ერთობაშია“ საოკუპაციო ხაზთან პატრულირებას იწყებს. აქტივისტები უკვე შეიკრიბნენ სოფელ ყარაფილასთან. მოძრაობის ორგანიზატორების განცხადებით, მათი ინიციატივა მხოლოდ სამშვიდობო ხასიათს ატარებს და მათი მხრიდან არანაირი პროვოკაცია არ იქნება.

პირველი სამკაციანი ჯგუფი დაახლოებით, 10:00 საათისთვის გავა საოკუპაციო ზოლის ყარაფილას მონაკვეთზე.

20-მა მოხალისემ უკვე გამოთქვა სურვილი, სამოქალაქო პატრულირებაში მიიღოს მონაწილეობა. საოკუპაციო ზოლის სიახლოვეს სამოქალაქო აქტივისტების გადაადგილება შეთანხმებული იქნება შინაგან საქმეთა სამინისტროსთან.

„ჩვენი გადაადგილება შეთანხმებული იქნება სამართალდამცავებთან, ჩვენ არ გადავკვეთთ თქვენი უსაფრთხოების ხაზს. ჩვენი მიზანია, აქ იმ დრომდე დავრჩეთ, ვიდრე ოკუპანტები არ დატოვებენ ტერიტორიას. შევეცდებით, რუსი სამხედროების მხრიდან ნებისმიერი პროვოკაციული ქმედების შესახებ ინფორმაცია მივაწოდოთ ჟურნალისტებს, საერთაშორისო ორგანიზაციებს და საზოგადოებას.

აქტიური კონტაქტი გვექნება ადგილობრივ მოსახლეობასთან და ვფიქრობთ, რომ ისინიც შეუერთდებიან ჩვენს ინიციატივას“, - განაცხადა აქციის ერთ-ერთმა ორგანიზატორმა დავით ქაცარავამ პატრულირების დაწყების წინ.

ჯომარდობის ეროვნული ფედერაციის პრეზიდენტმა და ტელეწამყვანმა დავით ქაცარავამ რუსეთთან ჰიბრიდული ომი ცოტა ხნის წინ დააანონსა, რაც საოკუპაციო ხაზთან პატრულირებას ითვალისწინებს.