აშშ-ის თავდაცვის მდივანი ჯიმ მატისი ამბობს, რომ ე.წ. ისლამური სახელმწიფოს ლიდერი აბუ ბაქრ ალ-ბაღდადი, რომლის ლიკვიდაციის შესახებ ინფორმაცია რამდენიმე კვირის წინ გავრცელდა, ცოცხალია. ამის შესახებ „რადიო თავისუფლება“ წერს.

რუსეთისა და სირიის ადამიანის უფლებათა ბრიტანული სადამკვირვებლო ორგანიზაციის ინფორმაციით, ISIS-ის ლიდერი ალ-ბაღდადი რუსეთის საჰაერო დაბომბვას ემსხვერპლა, თუმცა აღნიშნულ ინფორმაციას აშშ-ი და ერაყი არ ადასტურებდა.

„დარწმუნებულები ვართ, რომ ის ცოცხალია“, - განაცხადა მატისმა პრესკონფერენციაზე.

მატისის განცხადება დაადასტურა აშშ-ის კონტრტერორისტული ცენტრის დირექტორმა ნიკოლას რასმუსენმა.

მისი თქმით, არ არსებობს იმის მტკიცებულება, რომ ალ-ბაღდადი მკვდარია.