ისრაელის შინაგან საქმეთა სამინისტრო გადაწყვეტილებას, ალ აქსას მეჩეთში გამკაცრებული უსაფრთხოების ზომების გახანგრძლივების შესახებ, პალესტინელების მხრიდან პოლიციასთან ფიზიკური დაპირისპირება მოყვა. სამართალდამცველებთან შეტაკებების დროს, ერთი შეირაღებული პალესტინელი მოკლეს, ათობით აქტივისტი კი დაშავდა. იერუსალიმში მცხოვრები მუსლიმი მოსახლეობის მოთხოვნაა, უსაფრთხოების მიზნით ტაძრის მთაზე დამონტაჟებული მეტალის დეტექტორები გაუქმდეს და მეჩეთში შესვლის საშუალება მიეცეთ.
იერუსალიმში მიმდინარე არეულობის პარალელურად, დასავლეთ სანაპიროზე მდებარე ქალაქ ჰალამიშში თავდასხმის შედეგად სამი ისრაელელი მოქალაქე დაიღუპა. თავდამსხმელის ლიკვიდაცია პოლიციამ ადგილზევე განახორციელა.
უსაფრთხოების ზომების გამკაცრება ერთი კვირის წინ ტაძრის მთის ტერიტორიაზე განხორციელებულ თავდასხმას მოჰყვა. სამი შეიარაღებული მამაკაცი ისრაელელ პოლიციელებს თავს დაესხა. მათი ლიკვიდაცია ადგილზევე განხორციელდა. თავდამსხმელთა იდენტიფიცირების შემდეგ, დადგინდა, რომ ორი მათგანი იორდანიის მოქალაქე იყო. ალ აქსას მეჩეთი რამდენიმე დღით დაიხურა, 500-მდე მუსლიმი პარასკევის ლოცვაზე არ შეუშვეს, რასაც პალესტინელების მხრიდან პროტესტი მოჰყვა. ისინი რამდენიმე დღის განმავლობაში ღია ცის ქვეშ ლოცულობდნენ. ისლამურ სამყაროში მესამე წმინდა ადგილად გამოცხადებულ ალ აქსას მეჩეთში მისასვლელი გზა ოთხი დღის წინ ისევ გახსნეს, თუმცა იერუსალიმის მუსლიმი მოსახლეობა შიშობს, რომ ისრაელის მთავრობა ალ აქსას მეჩეთის სტატუს კვოს გაუქმებას გეგმავს, რასაც ისრაელის მთავრობა კატეგორიულად უარყოფს და პროვოკაციის მცდელობად აფასებს.
ალ აქსას მეჩეთის სტატუს-კვო ისრაელი-პალესტინის კონფლიქტში ერთ-ერთი მწვავე საკითხია, ისევე, როგორც აღმოსავლეთ იერუსალიმი და დასახლებების მშენებლობა იორდანეს დასავლეთ სანაპიროზე. სამი მონოთეისტური რელიგიისთვის წმინდა ადგილად გამოცხადებული ტაძრის მთის სტატუს-კვოს საკითხი კონფლიქტის გამწვავების მიზეზად სხვადასხვა ეპოქაში არაერთხელ ქცეულა. 2000 წელს მეორე ინტიფადა, იგივე ქვების ომი ტაძრის მთაზე ისრაელელი პოლიტიკოსის და მომავალი პრემიერ-მინისტრის არიელ შარონის ვიზიტს მოჰყვა. 5-წლიანი ინტიფადას შედეგად 3000 პალესტინელი და 1000-მდე ისრაელელი დაიღუპა. არსებული სტატუს-კვოს ფარგლებში ტაძრის მთაზე, რომელიც ალ აქსას მეჩეთს, ოთხ მინარეთს და ომარის მეჩეთს აერთიანებს, ებრაელ და ქრისტიან ვიზიტორებს შესვლა კვირაში მხოლოდ ხუთი დღის განმავლობაში 4 საათით შეუძლიათ.
წყარო: Reuters, BBC, Al Jazeera