მთიანი ყარაბაღის არაღიარებული რესპუბლიკის ე.წ. პარლამენტმა "მოქმედი პრეზიდენტი", ბაკო სააკიანი ახალი ვადით აირჩია. ფარული კენჭისყრის შედეგებით, არჩეულად ითვლება კანდიდატი, რომელიც დეპუტატების ხმების ორ მესამედს მოიპოვებს.
ბაკო სააკიანი ყარაბაღის თვითგამოცხადებული რესპუბლიკის ე.წ. პრეზიდენტის პოსტზე უფლებამოსოლებას 2020 წლამდე შეასრულებს. სწორედ ამ დრომდე აქვს ვადა ე.წ. პარლამენტსაც. ე.წ. მოქმედ პრეზიდენტს სამმა ფრაქციამ “თავისუფლმა სამშობლომ”, “დემოკრატიულმა არცახმა” და “დაშნაკცუთიუნმა” დაუჭირა მხარი.
ბაკო სააკიანი არაღიარებული მთიანი ყარაბაღის რესპუბლიკის ე.წ. პრეზიდენტის პოსტს უკვე 10 წელია იკავებს. აზერბაიჯანის საგარეო საქმეთა სამინისტრომ არჩევნებს სომხური მხარის მორიგი პოლიტიკური პროვოკაცია უწოდა. ბაქოში აცხადებენ, რომ ეს საერთაშორისო სამართლის ნორმების დარღვევაა.