საკონსტიტუციო სასამართლოს მეორე კოლეგიამ შიიტ მუსლიმთა სარჩელის არსებითი განხილვა დაიწყო. მოსარჩელე მოითხოვს, არაკონსტიტუციურად გამოცხადდეს საქართველოს მთავრობის 2014 წლის დადგენილება, რომელიც საქართველოში ოთხი რელიგიური მიმდინარეობისთვის საბჭოთა პერიოდში მიყენებული ზარალის ანაზღაურებას ითვალისწინებს.
მოსარჩელე მხარის განცხადებით შიიტ, სუნიტ და სხვა მიმდინარეობის მუსლიმებს აქვთ საერთო დაფინანსება, ანალოგიური წესი კი არ ვრცელდება ქრისტიანულ მიმდინარეობებზე, კერძოდ, კათოლიკურ და გრიგორიანულ ეკლესიებზე, რაც, მათი შეფასებით, დისკრიმინაციულია და ეწინააღმდეგება კონსტიტუციის მე-14 მუხლს.
მოსარჩელის აზრით, გარდა იმისა, რომ საერთო დაფინანსება ქმნის გარკვეულ უხერხულობას, ეს ფორმა სახელმწიფოსთვის საფრთხეებსაც შეიცავს. მათი განმარტებით, დაფინანსება შეუძლია მიიღოს ყველა მიმდინარეობის დაჯგუფებამ, რომელიც მუსლიმად დარეგისტრირდება, ასეთ შემთხვევაში კი თანხები შეიძლება რადიკალური მიმდინარეობების, მათ შორის ვაჰაბიტური დაჯგუფებების ხელში აღმოჩნდეს და გამოყენებული იქნას ანტისახელმწიფოებრივი ქმედებებისთვის, ამასთან, ასეთი ქმედებების შემთხვევაში, შეილახება მუსლიმთა ავტორიტეტიც.