აშშ-ისა და რუსეთის პრეზიდენტები - დონალდ ტრამპი და ვლადიმერ პუტინი ჰამბურგში, G20-ის სამიტზე, ოფიციალური შეხვედრის გარდა, კიდევ ერთხელ შეხვდნენ ერთმანეთს. ორი ლიდერის არაფორმალური შეხვედრის შესახებ ინფორმაციას Reuters-ი თეთრ სახლში საკუთარ წყაროზე დაყრდნობით ავრცელებს.

ამავე შეხვედრის შესახებ წერს The Hill-იც. მისი წყარო კი, საერთაშორისო საკონსალტინგო კომპანია Eurasia Group-ის ხელმძღვანელი იანა ბრემერია. მისი თქმით, პრეზიდენტებმა ოფიციალური მოლაპარაკებების შემდეგ, ერთად ივახშმეს. ბრემერის თქმით, ლიდერებმა დაახლოებით, ერთი საათის განმავლობაში ისაუბრეს და შეხვედრას მხოლოდ პუტინის თარჯიმანი ესწრებოდა. Eurasia Group-ის ხელმძღვანელი ამბობს, რომ ამერიკული მხარის მხრიდან თარჯიმნის არდასწრება ეროვნული უსაფრთხოების პროტოკოლის დარღვევაა.

მედიაში არაფერია ნათქვამი, თუ რა თემებზე ისაუბრეს ტრამპმა და პუტინმა.

Reuters-ს თეთრ სახლში მოგვიანებით განუცხადეს, რომ პრეზიდენტებს მეორე შეხვედრა არ გაუმართავთ და ეს „მცირეხნიანი საუბარი“ იყო.