უხვი ნალექის გამო დაზიანებული შატილის ჰესი შეკეთდა და თემში ელექტროენერგიის მიწოდება აღდგენილია.
ადგილზე „ენერგო-პრო ჯორჯიას“ სპეციალისტები იმყოფებოდნენ, რომლებიც ჰესის შეკეთებას ცდილობდნენ.
შატილში მცხეთა-მთიანეთის გუბერნატორი ლევან ზაუტაშვილი და დუშეთის გამგებელი ვაჟა ჩოხელიც ჩავიდნენ. დაათვალიერეს სტიქიის შედეგად დაზიანებული ჰესი და გზები. ასევე, მათ ადგილობრივებს საკვები პროდუქტები და პირველადი მოხმარების ნივთები ჩაუტანეს.
ხუთ ივლისს მოსულმა სტიქიამ შატილთან მისასვლელი საავტომობილო გზაც დააზიანა. გურო-შატილის მისასვლელ გზაზე ცხრა მეწყერია ჩამოწოლილი.
სპეციალისტების თქმით, გაწმენდითი სამუშაოები 10 დღის ვადაში უნდა დასრულდეს. გზის დაზიანებამ რაიონში ტურისტული სეზონის შეფერხებაც გამოიწვია, თუმცა როგორც ადგილობრივ ხელისუფლებაში აცხადებენ, პრობლემა დროულად აღმოიფხვრება.