აღმაშენებლის გამზირზე შენობის ფასადის ჩამონგრევის ფაქტზე გამოძიება დაიწყო.
როგორც საზოგადოებრივს შინაგან საქმეთა სამინისტროში განუცხადეს, მომხდარზე გამოძიება სისხლის სამართლის კოდექსის 240-ე მუხლის პირველი ნაწილით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც ჯანმრთელობის ნაკლებად მძიმე ან მძიმე დაზიანება გამოიწვია.
თბილისში, აღმაშენებლის გამზირზე, ჯანსუღ კახიძის სახელობის მუსიკალური ცენტრის შენობის ფასადის ჩამონგრევის შედეგად დაშავებულ ახალგაზრდა გოგონას ალადაშვილის კლინიკაში გამოკვლევები უტარდება.
შემთხვევა დღეს საღამოს მოხდა. ნაშალი მასალა გამვლელ გოგონას დაეცა.
ინციდენტის ამსახველი ვიდეო შემთხვევის ადგილზე საზოგადოებრივის ჟურნალისტმა გადაიღო.