გერმანიამ თურქეთში მდებარე ავიაბაზა ინჯირლიკიდან სამხედროების გაყვანა დაიწყო. პირველ ეტაპზე სამხედრო ნაწილს გერმანული საწვავმზიდი თვითმფრინავი და მისი მომსახურე პერსონალი დატოვებს, სულ 20 კაცი. მთლიანობაში ინჯირლიკის ბაზაზე 260 გერმანელი სამხედრო მოსამსახურე იმყოფება, იქვე დისლოცირებულია ექვსი მზვერავი თვითმფრინავი.

აღნიშნული ტექნიკა და სამხედროები იორდანიაში განლაგდება. გადაყვანის პროცესი ოქტომბერში უნდა დასრულდეს. ინჯირლიკის ბაზაზე მყოფი გერმანელი ჯარისკაცები „ისლამურ სახელმწიფოს“ წინააღმდეგ მიმდინარე ანტიტერორისტულ ოპერაციაში იყვნენ ჩართულები. გერმანიის მთავრობამ სამხედროების გაყვანა მას შემდეგ გადაწყვიტა, რაც ანკარამ გერმანელ დეპუტატებს ჯარისკაცების მონახულებაზე უარი უთხრა.