შვიდწლიანი ლოდინის შემდეგ გელათის სამონასტრო კომპლექსი მსოფლიო მემკვიდრეობის ძეგლთა ნუსხაში ბრუნდება.
პოლონეთის ქალაქ კრაკოვში მიღებული გადაწყვეტილების მიზეზი იმ რეკომენდაციების შესრულებაა, რომლებიც იუნესკო-მ ქართულ მხარეს გელათის რესტავრაციის პროცესში მისცა.
მცხეთის მერე გელათის სამონასტრო კომპლექსი უკვე მეორე ძეგლია, რომელიც ბოლო ერთ წელში იუნესკო-ს საფრთხისშემცველი ძეგლების ნუსხიდან კვლავ ძირითად ნუსხაში გადაიტანეს. თუმცა, მსოფლიო მემკვიდრეობის ძეგლთა სიაში აღარ არის ბაგრატი, რომელიც ძირითადი ნუსხიდან 2009 წელს დაწყებული რესტავრაციის გამო ამოიღეს.
იუნესკო-ს 41-ე სესიაზე შეთანხმდნენ, რომ შეუთანხმებელი სამუშაოების შედეგად ტაძარმა ავთენტურობა დაკარგა. არ არის გამორიცხული, რომ ძეგლი იუნესკო-ს სიაში სხვა ნომინაციით დაბრუნდეს. ამ მიმართულებით ოფიციალური თბილისი უკვე მუშაობს.