ევროპარლამენტის მომხსენებლებმა საგარეო ურთიერთობათა კომიტეტის თავმჯდომარეს საქართველოს, მოლდოვასა და უკრაინასთან მიმართებით მიღწეული პროგრესის შესახებ წლიური ანგარიშის მომზადების პრაქტიკის დამკვიდრების ინიციატივით მიმართეს. დევიდ მაკალისტერი ინიციატივას უკვე დათანხმდა.
როგორც საზოგადოებრივისთვის გახდა ცნობილი, ევროპარლამენტის საგარეო ურთიერთობათა კომიტეტში საქართველოს პროგრესის შესახებ ანგარიშის მოსმენა 2018 წლის დასაწყისში გაიმართება, სადაც, სავარაუდოდ, საქართველოს პრემიერ-მინისტრს მიიწვევენ.
მიმართვის ავტორები საქართველოს, მოლდოვისა და უკრაინის საკითხებზე ევროპარლამენტის მომხსენებლები ანდრეი მამიკინსი, მიქაელ გაჰლერი და პეტრას აუსტრევიჩუსი არიან. წერილის ტექსტი საზოგადოებრივისთვის ექსკლუზიურად გახდა ცნობილი.
„ჩვენ ღრმად ვართ დარწმუნებული, რომ ასოცირების შეთანხმება, ისევე როგორც ღრმა და ყოვლისმომცველი თავისუფალი ვაჭრობის შეთანხმება არის სასიცოცხლოდ მნიშვნელოვანი პლატფორმა, რომელიც საქართველოში, მოლდოვასა და უკრაინაში სავაჭრო ურთიერთობების განვითარებას, სოციალურ-ეკონომიკურ რეფორმებსა და ევროინტეგრაციის პროცესის დაჩქარებას უწყობს ხელს.
აღსანიშნავია, რომ ასოცირების შეთანხმებისა და ღრმა და ყოვლისმომცველი თავისუფალი ვაჭრობის შეთანხმების განხორციელება ზემოთ ხსენებულ ქვეყნებში მათ წინაშე არსებული გამოწვევების გამო დაბრკოლების გარეშე არ მიმდინარეობს. გარდა ამისა, არცერთი დოკუმენტის სრულად გაფართოებას არ ითვალისწინებს, ამიტომაც უპირველეს ყოვლისა, ვთხოვთ ევროკავშირს პარტნიორობის ახალ ეტაპზე გადასვლის ნება დაგვრთოს.
მსჯელობის შედეგად, ჩვენ მივედით ერთობლივ დასკვნამდე, რომ ასოცირების შეთანხმებისა და ღრმა და ყოვლისმომცველი თავისუფალი ვაჭრობის შეთანხმების განხორციელება ხარისხობრივად უფრო მაღალ დონეზე ავიდეს. ამისთვის საჭიროა ასოცირებულმა ქვეყნებმა პირადად გაგვაცნონ ანგარიში ამ და სხვა მიმართულებით შესრულებული წლიური მიღწევებისა და პროგრესის შესახებ.
ამ ტიპის ანგარიშები ევროკომისიასა და ევროპარლამენტს საშუალებას მისცემს ასოცირებულ პარტნიორ ქვეყნებში მიმდინარე პროცესები და ვითარება სწორად შეფასდეს. ასევე შედგენილი უნდა იქნას ინსტრუქცია ამ ქვეყნებში განსახორციელებელი რეფორმებისთვის, აუცილებლობის შემთხვევაში კი დავაფიქსიროთ ჩვენი შენიშვნები თუ წუხილი გარკვეულ საკითხებთან დაკავშირებით.
უფრო მეტიც, ეს წლიური ანგარიში შექმნის შესანიშნავ ფონს და იქნება ძალიან ინფორმაციული საპარლამენტო ასოცირების კომიტეტში მიმდინარე განხილვის პროცესში.
უნდა აღნიშნოს, რომ დღეს ჩვენ ნათლად ვხედავთ მწვავე პოლიტიკურ დაპირისპირებას საარჩევნო კანონსა და მიმდინარე საკონსტიტუციო რეფორმებთან დაკავშირებით საქართველოსა და მოლდოვაში. ასევე კრიტიკულად ფასდება უკრაინაში ანტიკორუფციული არასამთავრობო ორგანიზაციების წინააღმდეგ მიღებული ზომები. დღეს ევროკავშირი და ევროპარლამენტი დიალოგისა და ოფიციალური განცხადებების გარდა არავითარ ბერკეტს ამ ვითარების გამოსასწორებლად არ ფლობს. შესაბამისად, ახალი ინსტიტუციური მიდგომა აუცილებელია.
ჩვენ გვსურს საგარეო ურთიერთობების კომიტეტს ვთხოვოთ, ევროკომისიასა და სხვა, შესაბამის ინსტიტუტებს წინადადებით მიმართოს, რათა წლიური ანგარიშების პირისპირ გაცნობის პრაქტიკა ჩვენს ასოცირებულ პარტიორებთან, - საქართველო, მოლდოვა, უკრაინა, დამკვიდრდეს და მომავალი წლის დასაწყისიდან ამ პროცედურის განხორციელება დაიწყოს“, - აღნიშნულია წერილში.
როგორც ევროპარლამენტის მომხსენებელმა, პეტრას აუსტრევიჩუსმა საზოგადოებრივს განუცხადა, აღნიშნული წლიური პროგრეს ანგარიში ბოლო სამი წელია არ მომზადებულა.