გუშინ, შავი ზღვის აკვატორიაზე, შტორმის დროს მაშველების მიერ 20 ადამიანის გადარჩენა ნამდვილი თავდადებაა და ძალიან დასაფასებელია, - განაცხადა საქართველოს პრემიერ-მინისტრმა მთავრობის სხდომაზე.
გიორგი კვირიკაშვილმა მიმართა შინაგან საქმეთა სამინისტროს, უზრუნველყოს მათი სათანადოდ დაჯილდოვება და წახალისება.
„გუშინ შავი ზღვის აკვატორიაზე, 5 ბალამდე შტორმის დროს, მაშველებმა საკუთარი სიცოცხლის ფასად 20 ადამიანი გადაარჩინეს, აქედან ორი უცხო ქვეყნის მოქალაქე. ეს თავდადება არის ძალიან დასაფასებელი და მინდა შინაგან საქმეთა სამინისტროს მივმართო, რომ უზრუნველყოს მათი სათანადოდ დაჯილდოვება და წახალისება, ეს ძალიან მნიშვნელოვანია ვინაიდან ეს ადამიანები საკუთარ სიცოცხლეს რისკავენ სხვათა სიცოცხლის გადასარჩენად და ეს არის უაღრესად საპატიო საქმე. ძალიან საამაყოა, რომ ასეთი მაღალპროფესიონალი მაშველები გვყავს და ასევე მფრინავები, რომლებმაც სასწაული შეძლეს გუშინ“,- აღნიშნა კვირიკაშვილმა.
გუშინ, შავი ზღვის სანაპიროსა და ჩხოროწყუს რაიონის სოფელ ხაბუმეში მაშველებმა რამდენიმე ადამიანი გადაარჩინეს.