შპს საფინანსო კომპანია „საქართველოს“ მიერ დაზარალებულები მთავრობის ადმინისტრაციის წინ ქოლგების დადგმის უფლებას ითხოვენ.
როგორც მოშიმშილეები აცხადებენ, გუშინ კანცელარიის დაცვის თანამშრომელმა გაშლილი ქოლგები ააღებინა და განუცხადა, რომ კანცელარიის ტერიტორიაზე მათ ქოლგის დადგმის უფლება არ ჰქონდათ.
„გუშინ გამოვიდა კანცელარიის დაცვის თანამშრომელი, ქოლგები აგვაღებინა და გვითხრა, რომ აქ ქოლგის დადგმის უფლება არ გვქონდა. როგორ წარმოუდგენიათ ქოლგის გარეშე ამ სიცხეში დგომა. ერთი-ერთი მოშიმშილე, სიცხის გამო, გუშინ სასწრაფო დახმარებამ წაიყვანა. მოვითხოვთ, მოგვაქციოს სახალხო დამცველმა და მთავრობამ ყურადღება“, - განაცხადა დაზარალებულმა ეთერ კოხტაშვილმა.
მოშიმშილეები უკვე მერვე დღეა შიმშილობენ და მათი მთავარი მოთხოვნაა, კანცელარიაში საკოორდინაციო ჯგუფი შეიქმნას, რომელიც, მათი თქმით, კომპანიის ხელმძღვანელის გარდა, სხვა დამნაშავე პირებსაც გამოავლენს, ასევე შეიმუშავებს სქემას, თუ როგორ მოხდება მათი თანხების დაბრუნება.