„ქართული ოცნების“ თბილისის მერობის კანდიდატის კახა კალაძის განცხადებით, უახლოეს მომავალში წარმოადგენენ ხედვებს, თუ რა იქნება და რა გაკეთდება დედაქალაქში. ამის შესახებ მან მთაწმინდის პარკში, მერობის კანდიდატად მისი ოფიციალურად წარდგენის შემდეგ ჟურნალისტებს განუცხადა.
„უპირველესად, მინდა, ძალიან დიდი მადლობა გადავუხადო ჩვენს გუნდს, პარტიის თავმჯდომარე ბატონ გიორგი კვირიკაშვილს ამ ნდობისთვის. მე ძალიან კარგად მაქვს გააზრებული, თუ რამდენად საპასუხისმგებლოა იყო, ჩვენი დედაქალაქის თბილისის მერი.
მე კარგად მაქვს გააზრებული ყველა ის პრობლემა, რომელიც აწუხებს დედაქალაქის მოსახლეობას და უახლოეს მომავალში, ჩვენ წარმოგიდგენთ ჩვენს ხედვებს, მიზნებს თუ რა იქნება და რა გაკეთდება ჩვენს დედაქალაქში და მე ვფიქრობ, ეს იქნება ძალიან საინტერესო და მნიშვნელოვანი დედაქალაქის მოსახლეობისათვის. კიდევ ერთხელ, მადლობა მხარდაჭერისთვის თითოეულ თბილისელს და დარწმუნებული ვარ იმაში, რომ თბილისი აუცილებლად გაიმარჯვებს“, - განაცხადა კახა კალაძემ.
კახა კალაძე მთაწმინდის პარკში „ქართული ოცნების “თბილისის მერობის კანდიდატად ოფიციალურად პრემიერ-მინისტრმა გიორგი კვირიკაშვილმა წარადგინა.