„მოთმინების დრო დასრულდა, ახლა ჩრდილოეთ კორეასთან მიმართებაში საპასუხო ზომები უნდა მივიღოთ“, - ეს განცხადება ამერიკის შეერთებული შტატების პრეზიდენტმა სამხრეთ კორეელ კოლეგასთან შეხვედრის შემდეგ გამართულ ბრიფინგზე გააკეთა.
დონალდ ტრამპმა ფხენიანს მოუწოდა, პოლიტიკური კურსი დაუყოვნებლივ შეცვალონ, წინააღმდეგ შემთხვევაში, ამერიკის შეერთებული შტატები მოქმედების ახალ სტრატეგიაზე გადავა.
„მოთმინების პერიოდი დასრულდა, რადგან ამას რეგიონისთვის დადებითი შედეგი არ მოჰყოლია. ჩრდილოეთ კორეის სახით ჩვენ ვხედავთ უსასტიკეს დიქტატორულ რეჟიმს, რომელიც კაცობრიობისთვის მავნე და საზიანოა. მათ ბირთვულ პროგრამაზე მუშაობის ამბიციას სათანადო პასუხი უნდა გაეცეს. ამ რეჟიმმა საკუთარი ხალხი გააუბედურა, იმსხვერპლა ჩვენი მოქალაქე, ახალგაზრდა ბიჭი ოტო უორმბირი. ამერიკის შეერთებული შტატები მის მოკავშირეებთან, სამხრეთ კორეასა და იაპონიასთან ერთად მოუწოდებს ფხენიანს, არჩეული კურსი შეცვალოს, თორემ პასუხს მიიღებენ, რადგან ჩვენი მიზანი რეგიონში მშვიდობა და სტაბილურობაა.“ - განაცხადა დონალდ ტრამპმა
ტრამპისა და სამხრეთ კორეის ახალარჩეული პრეზიდენტის, მუნ ჯე ინის საუბრის მთავარ თემას სწორედ ჩრდილოეთ კორეიდან მომდინარე საფრთხე და შორეული აღმოსავლეთის რეგიონში მშვიდობის დამყარების საკითხი წარმოადგენდა.