საზოგადოებრივი მაუწყებლის ისტორიაში ახალი ეტაპი იწყება. მენეჯმენტის მიერ მომზადებული მატერიალურ-ტექნიკური გადაიარაღების გეგმა სამეურვეო საბჭომ დღეს ერთხმად დაამტკიცა. ეს არის ოთხ წელზე გათვლილი და სამ ეტაპად დაყოფილი გეგმა, რომელიც ახალი აპარატურის შეძენას, კამერების პარკის და სამონტაჟოების განახლებას, ახალ, ანუ ტელევიზიის მესამე კორპუსში გადასვლას და თანამედროვე ტექნოლოგიების დანერგვას გულისხმობს.

პროექტის განსაკუთრებულ მნიშვნელობაზე ყველა მხარე თანხმდება. მაუწყებლის მასშტაბური ტექნიკური გადაიარაღება წლებია აღარ მომხდარა. აპარატურის ნაწილი უკვე რამდენიმე ათეულ წელს ითვლის.