საქართველოში აშშ-ის ელჩის მოადგილე ნიკოლას ბერლინერმა, აშშ-ის საგანგებო და სრულუფლებიანი ელჩის იან კელის სახელით, სახელმწიფო უსაფრთხოების სამსახურის წარმომადგენლები ორმხრივი თანამშრომლობის კუთხით განსაკუთრებული წვლილის შეტანისთვის და აშშ-ის საელჩოს რეგიონალური უსაფრთხოების ოფისის საქმიანობის მხარდაჭერისთვის დააჯილდოვა.
ნიკოლას ბერლინერმა მადლობის სიგელები სუს-ის კონტრტერორისტული ცენტრის უფროს ირაკლი ჩიმაკაძეს და სპეციალური ოპერაციების დეპარტამენტის განაღმვის სამმართველოს უფროს მერაბ შენგელიას გადასცა.
ნიკოლას ბერლინერმა წარმატებული თანამშრომლობისთვის საქართველოს მთავარი პროკურორის მოადგილეს გიორგი გოგაძეს, მთავარი პროკურატურის შინაგან საქმეთა სამინისტროს გენერალურ ინსპექციაში, ცენტრალური კრიმინალური პოლიციის დეპარტამენტსა და საპატრულო პოლიციის დეპარტამენტში გამოძიების საპროცესო ხელმძღვანელობის დეპარტამენტის უფროსს ნიკოლოზ დგებუაძეს, ამავე დეპარტამენტის პროკურორებს - თეა გიორგაძეს, ირინე ჩოჩიასა და მილენა მითაიშვილს, ასევე ქ. თბილისის ვაკე-საბურთალოს რაიონული პროკურატურის პროკურორს ქეთევან გურაშვილს მადლობის სიგელები გადასცა.
ღონისძიებას საქართველოს მთავარი პროკურორი ირაკლი შოთაძე და მთავარი პროკურორის მოადგილე გიორგი გოგაძე ესწრებოდნენ. მთავარმა პროკურორმა მადლობა გადაუხადა ნიკოლას ბერლინერის და აშშ-ს საელჩოს პროკურატურის რეფორმირებისა და განვითარების საქმეში გაწეული მნიშვნელოვანი მხარდაჭერისთვის და იმედი გამოთქვა, რომ საქართველოს პროკურატურისა და ამერიკის შეერთებული შტატების საელჩოს აქტიური და ნაყოფიერი თანამშრომლობა მომავალშიც გაგრძელდება.
პროკურატურის თანამშრომლებს მადლობის სიგელები აშშ-ის საელჩოსა და შს სამინისტროს ამხანაგური საფეხბურთო მატჩის დაწყებამდე გადასცეს.