პარლამენტმა საქართველოს კონსტიტუციური კანონის პროექტი 115 ხმით პირველი მოსმენით დაამტკიცა.
დღესვე, პირველი მოსმენით, 115 ხმით მიიღეს საქართველოს კონსტიტუციური კანონის პროექტი აჭარის ავტონომიური რესპუბლიკის შესახებ. კენჭისყრაში მონაწილეობა არ მიუღია ოპოზიციას, რომელიც სხდომას ბოიკოტის ნიშნად არ ესწრება.
დღეს მოქმედი კონსტიტუციის თანახმად, კონსტიტუციური კანონის პროექტი მიღებულად ითვლება იმ შემთხვევაში, თუ მას მხარს დაუჭერს პარლამენტის სრული შემადგენლობის არანაკლებ სამი მეოთხედი, ანუ 150 წევრიან პარლამენტში სულ მცირე 113 დეპუტატი.
საპარლამენტო უმრავლესობის შემადგენლობაში დღეს 116 წევრია .დღის პირველ ნახევარში, პლენარულ სხდომაზე რეგისტრაცია 86-მა დეპუტატმა გაიარა. კენჭისყრის წინ გამართული რეგისტრაციისას კი ტაბლოზე 115 დამსწრე დაფიქსირდა.
კონსტიტუციური კანონის პროექტის მეორე მოსმენა ხვალინდელ სესიაზე იგეგმება. ქართული ოცნება პროექტის ორი მოსმენით მიღებას მიმდინარე საგაზაფხულო სესიაზე აპირებს, საბოლოოდ დამტკიცებას კი საშემოდგომო სესიაზე.
კონსტიტუციის დღეს მოქმედ რედაქციაში მითითებულია, რომ კონსტიტუციის გადასინჯვის კანონპროექტი მიღებულად ჩაითვლება, თუ მას საქართველოს პარლამენტის ორ თანამიმდევრულ სესიაზე სულ ცოტა სამი თვის ინტერვალით მხარს დაუჭერს საქართველოს პარლამენტის სრული შემადგენლობის არანაკლებ სამი მეოთხედი.
შორენა ხვიჩია განავრცობს თემას.