კვალიფიციური ოპოზიციური პარტიების საკოორდინაციო საბჭო საკონსტიტუციო რეფორმასთან დაკავშირებით საკუთარ მოსაზრებას ვენეციის კომისიას და საერთაშორისო ორგანიზაციებს დღეს გადაუგზავნის.
დოკუმენტის ერთობლივი ვერსია უკვე შემუშავებულია. საბჭო მოუწოდებს ხელისუფლებას, დაჯდეს ოპოზიციასთან ერთად მოლაპარაკებათა მაგიდაზე და სრულად გაითვალისწინოს ვენეციის კომისიის რეკომენდაციები. წინააღმდეგ შემთხვევაში, ინტერპარტიული ჯგუფი არ გამორიცხავს, რომ აქციები გაიმართოს.
ჩვენი შეფასებით, საქართველოში საკონსტიტუციო რეფორმა ჩავარდა, - ამის შესახებ განცხადება
კვალიფიციური ოპოზიციური პარტიების საკოორდინაციო საბჭოს წევრმა მამუკა კაციტაძემ გააკეთა. მისი თქმით, დღევანდელი შეხვედრის მიზანი, საკონსტიტუციო რეფორმის შესახებ, საბჭოს პოზიციის დაფიქსირებაა.
„დემოკრატიული მსოფლიოს გამოცდილება არ იცნობს საკონსტიტუციო რეფორმა, სადაც ნულოვანია კონსენსუსი, ანუ თანხმობის ხარისხი არის ნული. ერთ მხარეს არის ხელისუფლება, მეორე მხარეს არის ყველა დანარჩენი. ასეთი რეფორმა ვერ ჩაითვლება ნორმალურ დემოკრატიულ ქვეყანაში განვითარებულ საკონსტიტუციო რეფორმის პროცესად”, - განაცხადა მამუკა კაციტაძემ.
დღესვე კვალიფიციური ოპოზიციური პარტიების საკოორდინაციო საბჭო შეხვედრაზე სამომავლო ნაბიჯებზეც იმსჯელებს.