არასამთავრობო ორგანიზაციები ბოიკოტის რეჟიმზე გადადის და საკონსტიტუციო ცვლილებებზე საპარლამენტო განხილვებში მონაწილეობას აღარ მიიღებენ. მესამე სექტორის პროტესტის მიზეზი უმრავლესობის გადაწყვეტილებაა, რომლის მიხედვითაც, საარჩევო სისტემა შერეულიდან პროპორციულზე არა 2020 წელს, არამედ 2024 წელს გადავა. არასამთავრობო ორგანიზაციები მმართველ გუნდს არათანმიმდევრულობაში ადანაშაულებენ და ამბობენ, რომ "ქართულმა ოცნებამ“ როგორც მესამე სექტორისთვის, ისე საზოგადოებისა და ვენეციის კომისიისთვის მიცემული პირობა დაარღვია.
მათი თქმით, უმრავლესობის ასეთი მიდგომა ეჭვქვეშ აყენებს არასამთავრობო სექტორის და სხვა დაინტერესებული მხარეების სამომავლო თნამშრომლობას უმრავლესობასთან. სამოქალაქო სექტორი მოუწოდებს ხელისუფლებას, გაითვალისწინოს არასამთავრობო ორგანიზაციების და საზოგადოებისთვის მიცემული დაპირება და კონსტიტუცია არ გახდეს ერთი პარტიის ინტერესზე მორგებული. ბოიკოტის რეჟიმს სულ 15-მდე არასამთავრობო ორგანიზაცია აცხადებს.