სტამბოლში დაკავებულ საქართველოს ხუთ მოქალაქეს, აღკვეთის ღონისძიების სახით, წინასწარი პატიმრობა შეეფარდა.
როგორც საზოგადოებრივთან საუბარში სტამბოლში საქართველოს გენერალური კონსულის თანაშემწე, ლალი ნაკაიძე აცხადებს, საკონსულომ უკვე მიიღო თურქეთის პროკურატურიდან ოფიციალური წერილი საქართველოს მოქალაქეების დაკავების შესახებ და მიმდინარეობს გამოძიება. ნაკაიძე ჯერჯერობით ვერ აკონკრეტებს, როდის გაიმართება დაკავებულთა სასამართლო პროცესი.
შეგახსენებთ, დიდი ოდენობით თანხის გამოძალვის ბრალდებით, თურქეთში საქართველოს ხუთი მოქალაქე 20 ივნისს დააკავეს. თურქული მედიის ინფორმაციით, დაჯგუფება სტამბოლის სხვადასხვა უბანში მოქმედებდა.
ბოლო ერთი წლის განმავლობაში, გამომძალველებს ხუთ სხვადასხვა შემთხვევას უკავშირებენ. დაკავების ოპერაცია სტამბოლში განხორციელდა.