საქართველოს თავდაცვის ყოფილი მინისტრის დავით კეზერაშვილის ბრალდების საქმეზე სოდ-ის ყოფილი ხელმძღვანელი დევი ჭელიძე დაიკითხება.
ნიჟარაძეებისთვის ქონების ჩამორთმევის საქმეზე დევი ჭელიძის დაკითხვა პროკურორმა მოითხოვა, რაც მოსამართლემ დააკმაყოფილა. მისი დაკითხვა მოხდება დისტანციურად, რადგან ის საქართველოში არ იმყოფება.
გამოძიების ინფორმაციით, სწორედ სოდ-ის წარმომადგენლები იმყოფებოდნენ 2010 წელს თამაზ ნიჟარაძის სახლში იმ პერიოდში, როდესაც ბიზნესმენისგან დავით კეზერაშვილი მოითხოვდა ქონების იძულებით დათმობას.
პროკურატურის განცხადებით, მაშინ ნიჟარაძეების სახლში მყოფ სამართალდამცველების დავალება კი იყო ბიზნესმენ ნიჟარაძის კონტროლი და ასევე ამ კონტროლის მიზანი იყო ბიზნესმენზე ფსიქოლოგიური ზეწოლა.
ქონების უკანონოდ მითვისებაზე დავით კეზერაშვილის საქმის განხილვა დღეს წერილობითი მტკიცებულებების გამოკვლევით გაგრძელდა. პროცესზე პროკურორი გიორგი მიქავამ წარადგინა სატელეფონი ამონაწერები. მათ შორის ბიზნესმენ თამაზ ნიჟარაძის მობილური ტელეფონიდან შემავალი და გამავალი ზარები. თამაზ ნიჟარაძე შუამავლის საშუალებით ესაუბრებოდა დავით კეზერაშვილს.
საქმე ეხება თამაზ და ზურაბ ნიჟარაძეების ქონებას ფოთის პორტში. ბრალდების მხარის ცნობით, 2010 წელს თავდაცვის ყოფილმა მინისტრმა დავით კეზერაშვილმა ე.წ პიქსელის შენობაში დაიბარა თამაზ ნიჟარაძე და ფოთის პორტში მისი ბიზნეს აქტივების გადაფორმება მოსთხოვა. პარალელურად კი ბიზნესმენის სახლში კონტროლის მიზნით, რამდენიმე დღის განმავლობაში სამართალდამცველები იყოფებოდნენ, რათა თამაზ ნიჟარაძეზე ფსიქოლოგიური ზეწოლა განხორციელებულიყო.
საბოლოოდ პროკურატურის ინფორმაციით, ნიჟარაძეებმა მრავალმილიონიანი საკუთარი ბიზნეს აქტივები კეზერაშვილის კუთვნილ კომპანიებზე გადააფორმეს.