შინაგან საქმეთა სამინისტროს საპატრულო პოლიციის თანამშრომლებმა, ქულათა სისტემის ამოქმედებასა და სხვა საკანონმდებლო ცვლილებებთან დაკავშირებით, მთელი ქვეყნის მასშტაბით, გადამზადების კურსი გაიარეს.
უწყების ცნობით, შსს-ს კვლევის და განვითარების დეპარტამენტის წარმომადგენლები საქართველოს ყველა რეგიონში ჩავიდნენ და პატრულ-ინსპექტორებს ტრენინგები ჩაუტარეს.
მიმდინარე წლის პირველი ივლისიდან ძალაში შედის ცვლილებები პოლიციის შესახებ საქართველოს კანონში, საქართველოს ადმინისტრაციულ სამართალდარღვევათა კოდექსსა და საგზაო მოძრაობის შესახებ საქართველოს კანონში, რომელთა თანახმად, საქართველოში მართვის მოწმობისთვის მინიჭებულ ქულათა სისტემა და უკონტაქტო პატრულირება ამოქმედდება.
ასევე, მკაცრდება ბავშვთა ტრანსპორტით გადაყვანის უსაფრთხოების წესები.