წყალდიდობის გამო, ჩხოროწყუს მუნიციპალიტეტის სოფელ ახუთში 500-კომლიანი სოფელი რაიონულ ცენტრს მოწყვეტილია. როგორც „მოამბის“ ჟურნალისტი ადგილიდან იუწყება, მდინარემ საავტომობილო ხიდი დააზიანა, რის გამოც აღნიშნულ ტერიტორიაზე მოძრაობა აიკრძალა.
მოსახლეობას გადაადგილება 20-კილომეტრიანი შემოვლითი გზით უხდება, თუმცა ზოგიერთები მდინარის ფონითაც გადადიან, რაც საკმაოდ სახიფათოა.
ახუთში იმყოფებოდნენ ინფრასტრუქტურის მინისტრის მოადგილე კახა გულედანი და სამეგრელო-ზემო სვანეთის გუბერნატორი ლევან შონია.
კახა გულედანის თქმით, ახუთის ხიდი იმდენად ავარიულია, რომ მისი აღდგენა შეუძლებელია და იქ ახალი ხიდი უნდა აშენდეს.
გადაუღებელმა წვიმებმა სამეგრელოს რეგიონში სერიოზული პრობლემები შექმნა. დაიტბორა ადგილობრივების კუთვნილი საკარმიდამო ნაკვეთები და სავარგულები. ადიდებულმა მდინარეებმა გაარღვია ნაპირსამაგრი გაბიონები, დანგრეულია ხიდები.
სტიქიის გამო, სამეგრელო-ზემო სვანეთის გუბერნატორის ადმინისტრაციასა და ყველა პრობლემურ მუნიციპალიტეტში საგანგებო შტაბები და ზარალის დამთვლელი კომისიები 24-საათიანი რეჟიმით მუშაობენ.