რუსეთის პრეზიდენტმა რამდენიმე წუთის წინ განაცხადა, რომ რუსეთს ამერიკის შეერთებულ შტატებში ბევრი მეგობარი ჰყავს. კითხვა-პასუხის მარათონის დროს, ვლადიმერ პუტინს ამერიკის შეერთებული შტატების მოქალაქე დაუკავშირდა და ჰკითხა, თუ რა მეთოდებით აპირებს რუსეთი ამერიკაში არსებულ რუსოფობიასთან გამკლავებას.
„სამწუხაროა, რომ ეს ანტირუსული ისტერია დასავლურ მედიაში ძალიან უარყოფითად მოქმედებს ამერიკელ ხალხზე. თუმცა, გარწმუნებთ, რუსები ამერიკის შეერთებულ შტატებს მტრად არ განიხილავენ. ჩვენ დაინტერესებული ვართ ამერიკასთან ურთიერთობების ნორმალიზებით. რუსეთში ძალიან ბევრი ადამიანი აფასებს ამერიკის შეერთებული შტატების მიღწევებს არაერთ სფეროში“, - განაცხადა ვლადიმერ პუტინმა.
პუტინმა ასევე აღნიშნა, რომ მოსკოვი მზადაა მასობრივი განადგურების იარაღის გაუვრცელებლობასა და გლობალურ სიღარიბესთან ბრძოლის პროცესში ვაშინგტონთან ითანამშრომლოს.
რუსეთის პრეზიდენტს დარბაზში ამერიკის არჩევნებში რუსეთის, სავარაუდო ჩარევის საკითხზეც კითხვა დარბაზში მჯდომმა ერთ-ერთმა რედაქტორმაც დაუსვა, რაზეც რუსეთის პრეზიდენტმა უპასუხა, რომ ეს არის ამერიკული პროპაგანდა და მცდელობა საზოგადოებაზე გავლენა მოახდინონ.
„ამერიკის შეერთებული შტატები არა ერთი ქვეყნის შიდა საქმეებში ჩარეულა, თუმცა ამაზე არავინ ლაპარაკობს. დღეს ამერიკის შეერთებულ შტატებს არავითარი მტკიცებულება არ აქვს, რომ რუსეთი საპრეზიდენტო არჩევნებში ჩაერია. გარდა ამისა, ჩვენ ყველამ მოვისმინეთ, რომ ფედერალური ბიუროს ყოფილმა დირექტორმა ჯეიმს კომიმ პრეზიდენტთან საუბარი ჩაიწერა, შემდეგ კი მეგობრის საშუალებით მედიას მიაწოდა. რით განსხვავდება ამ შემთხვევაში ბატონი კომი ედვარდ სნოუდენისგან?! ის მოიქცა არა როგორც მაღალჩინოსანი, არამედ როგორც აქტივისტი, უფლებადამცველი. თუ ოდესმე ამერიკის შეერთებული შტატები კომის წინააღმდეგ სამართლებრივ დევნას დაიწყებს, რუსეთი მზადაა მას, სნოუდენის მსგავსად, თავშესაფარი მისცეს“, - განაცხადა პუტინმა.