16 ივნისს ამერიკის შეერთებულ შტატებში მოღვაწე, ცნობილი ქართველი პიანისტის ედიშერ სავიცკის კონცერტი ჯანსუღ კახიძის სახელობის მუსიკალურ-კულტურული ცენტრში გაიმართება. საღამოს მაესტრო დავით მუქერია უდირიჟორებს. პროგრამაშია დიმიტრი შოსტაკოვიჩისა და სერგეი პროკოფიევის ნაწარმოებები. თბილისის სიმფონიურ ორკესტრთან ერთად სავიცკი 2004 წლის შემდეგ, პირველად დაუკრავს.
ედიშერ სავიცკი 1998 წლიდან ალაბამას შტატში მოღვაწეობს. იგი ინდიანას უნივერსიტეტის სახელგანთქმული საფორტეპიანო სტუდიის კურსდამთავრებული და ამჟამად ალაბამას უნივერსიტეტის საფორტეპიანო სკოლის ასისტენტ-პროფესორია. მუსიკალური ხელოვნების დოქტორის ხარისხი ედიშერ სავიცკიმ 2013 წელს მიჩიგანის სახელმწიფო უნივერსიტეტში მოიპოვა. მრავალგზის საერთაშორისო კონკურსების გამარჯვებული მუსიკოსი, მსოფლიოს პრესტიჟული საკონცერტო დარბაზების (კარნეგი ჰოლი, ვიგმორ ჰოლი, სალ კორტო და სხვა) და მუსიკალური ფესტივალების (ზალცბურგის, რურის, რავინიას, რავენას, მაჯიო მუზიკალე და სხვა) ხშირი სტუმარია, გამოდის სხვადასხვა სიმფონიურ ორკესტრებთან მსოფლიოს მასშტაბით. ედიშერ სავიცკი კომპანია YAMAHA-ს არტისტია.
თბილისის სიმფონიურ ორკესტრთან ედიშერ სავიცკი პირველად საერთაშორისო მუსიკალური ფესტივალის „შემოდგომის თბილისი“ ფარგლებში გამოვიდა ვახტანგ კახიძის დირიჟორობით.