მოსამართლეების უმრავლესობა მომხრე იყო, რომ "მოსმენების შესახებ კანონის" წინაამღდეგ მომზადებული სარჩელი საკონსტიტუციო სასამართლოს პლენუმს განეხილა, - ამის შესახებ საკონსტიტუციო სასამართლოს იურისტმა გიორგი ლომთაძემ განაცხადა. საზოგადოებრივთან საუბარში იურისტი განმარტავს, რომ დახურულ ფორმატში მოსამართლეებმა იმსჯელეს და მხარი დაუჭირეს მერაბ ტურავას და ლალი ფაფიაშვილის მოთხოვნას, რათა მოსმენების წინაამღდეგ მომზადებული სარჩელი პლენუმს განეხილა. კანონმდებლობის მიხედვით, იმისათვის, რომ პლენუმმა გამოთქვას საქმის განხილვაზე მზადყოფნა, საკმარისია სულ მცირე 5 ხმა.
"საკონსტიტუციო სასამართლოს შესახებ კანონმდებლობით დადგენილია სტანდარტი, რომლის მიხედვით, თუ განსახილველი საქმე თავისი შინაარსით წარმოშობს კონსტიტუციის განმარტების ან მნიშვნელოვან სამართლებრივ პრობლემას, ასეთ შემთხვევაში, სასამართლოს პლენუმი მსჯელობს ამის თაობაზე, მიიღოს თუ არა ეს საქმე პლენუმზე განსახილველად. მოცემულ შემთხვევაში საკონსტიტუციო სასამართლოს ორი წევრის დასაბუთებული შუამდგომლობის საფუძველზე, საკონსტიტუციო სასამართლოს პლენუმმა მიიღო აღნიშნული საკონსტიტუციო სარჩელი არსებითად განსახილველად. დღევანდელი რეალობით, სასამართლო 20 ივნისს დაიწყებს ამ განხილვას, გამწესრიგებელი სხდომის ფორმატში, ანუ იმსჯელებს, რამდენად უნდა იქნეს მიღებული განსახილველად აღნიშნული კონსტიტუციური სარჩელი. ასევე, მნიშვნელოვანია აღინიშნოს, რომ ამ სხდომაზე გადაწყდება რამდენად შეიძლება, რომ საკონსტიტუციო სასამართლომ გამარტივებული წარმოების ფორმით ცნოს სადავო ნორმები არაკონსტიტუციურად საქმის განხილვის გამწესრიგებელი სხდომის ეტაპზე. თუ სასამართლო დაადგენს, რომ გამწესრიგებელი სხდომის ეტაპზე, დავის საგანი არის იდენტური შინაარსის, რაც საკონსტიტუციომ უკვე ცნო არაკონსტიტუციურად, ასეთ შემთხვევაში საკონსტიტუციო სასამართლო იღებს განჩინებას და წყვეტს სამართალწარმოებას, არ იღებს საქმეს განსახილველად და გამარტივებული წარმოებით, ანუ ნაკლებ დროში იღებს საბოლოო გადაწყვეტილებას არაკონსტიტუციურად ცნობის თაობაზე. მოცემულ შემთხვევაშიც ეს შუამდგომლობა მოსარჩელე მხარის მიერ უკვე დაყენებულია",- აღნიშნა გიორგი ლომთაძემ.
მისივ ეთქმით, კანონმდებლობით დადგენილია, რომ კოლეგიის ერთ წევრსაც აქვს შესაძლებლობა, რომ დასაბუთებული შუამდგომლობით მიმართოს პლენუმს, საქმის გადაცემის მოთხოვნით. ამ შემთხვევაში სახეზეა ორი წევრის შუამდგომლობა.
კოლეგიაში შედიან - ამავე კოლეგიის თავმჯდომარე ლალი ფაფიაშვილი, მერაბ ტურავა, გიორგი კვერენჩხილაძე და მაია კოპალეიშვილი. შუამდგომლობის ავტორები არიან ლალი ფაფიაშვილი და მერაბ ტურავა.
"ცხადია, მოსამართლებმა ერთად მიიღეს გადაწყვეტილება.არ მაქვს ინფორმაცია რა მოხდა და რამდენმა დაუჭირა მხარი 9 მოსამართლიდან. ცხადია, რომ პლენუმიდან 5 წევრი იყო მომხრე, რადგან სულ მცირე 5 ხმა არის საჭირო. ეს იყო დახურულ ფორმატში მსჯელობა", - განაცხადა საკონსტიტუციო სასამართლოს იურისტმა
20-22 ივნისს საკონსტიტუციო სასამართლო "მოსმენების შესახებ კანონზე" მორიგ სარჩელს განიხილავს. .