ევროკავშირის ელჩი უკრაინაში ჰიუ მინგარელი მიიჩნევს, რომ უკრაინის მთავრობისა და უკრაინელი ხალხის ევროკავშირისკენ მისწრაფება ხვალ ყველაზე ნათლად გამოვლინდება. ინფორმაცია უკრაინულმა პრესამ პრეზიდენტის ოფიციალურ საიტზე დაყრდნობით გაავრცელა.

პრეზიდენტ პეტრო პოროშენკოსთან შეხვედრისას მინგარელიმ განაცხადა, რომ ვიზალიბერალიზაცია უკრაინელ ხალხს ევროპასთან კიდევ უფრო მეტად დააახლოებს.

„თქვენ გექნებათ საშუალება დასავლეთ ევროპის 33 ქვეყანაში უვიზოდ გადაადგილდეთ. ეს არის საუკეთესო საშუალება ევროკავშირისთვის, კიდევ უფრო ახლოს გაიცნოს შესანიშნავი ევროპული სახელმწიფო უკრაინა და ადამაინებს შორის მჭიდრო კავშირი დამყარდეს“, - აღნიშნა ელჩმა.

უკრაინის მოქალაქეებისთვის უვიზო რეჟიმის ამოქმედება ევროპარლამენტმა 6 აპრილს დაამტკიცა. მოგვიანებით ევროკავშირის მუდმივ წარმომადგენელთა კომიტეტმა ხელი მოაწერა. ვიზალიბეალიზაციის ძალაში შესვლას ერვოკავშირის საბჭომ 11 მაისს დაუჭირა მხარი, ხოლო საბოლოო დოკუმენტის გაფორმების ცერემონია 17 მაისს სტრასბურგში გაიმართა. ვიზალიბერალიზაციის დოკუმენტს ევროპარლამენტის პრეზიდენტმა, ანტონიო ტაიანიმ, ევროკავშირის თავმჯდომარე ქვეყნის -მალტის პრემიერ-მინისტრმა, ჯოსეფ მუსკატმა და უკრაინის პრეზიდენტმა, პეტრო პოროშენკომ მოაწერეს ხელი.

მოლაპარაკებები უკრაინასა და ევროკავშირს შორის უვიზო მიმოსვლის შესახებ 2008 წელს დაიწყო. 2013 წლის ბოლოს ვიქტორ იანუკოვიჩმა ასოცირების შეთანხმების გაფორმებაზე უარი თქვა, რასაც ქვეყანაში საპროტესტო აქციები და ვიქტორ იანუკოვიჩის მთავრობის დამხობა მოჰყვა.