„თავისუფალი დემოკრატები“ და "რესპუბლიკური პარტია" საკონსტიტუციო ცვლილებების განხილვასთან დაკავშირებით ერთობლივ განცხადებას ავრცელებენ.
როგორც განცხადებაშია აღნიშნული, პარტიები საქართველოს კონსტიტუციის ცვლილებების პროექტის სწრაფ რეჟიმში განხილვას საგანგაშოდ მიიჩნევენ.
„ქართულმა ოცნებამ“ უკვე დაიწყო საკომიტეტო მოსმენები, იმ ფონზე, როდესაც ირაკლი კობახიძე საჯაროდ აცხადებდა, რომ ცვლილებების მიღებისას აუცილებლად გაითვალისწინებდნენ ვენეციის კომისიის მოსაზრებებსა და შენიშვნებს. მოგეხსენებათ, ვენეციის კომისიის დასკვნა 17 ივნისს გამოქვეყნდება. მმართველი პოლიტიკური ძალა, კიდევ ერთხელ, თვალნათლივ გვიდასტურებს, რომ მისთვის არავითარი მნიშვნელობა არ აქვს არც ოპოზიციური პოლიტიკური პარტიების, არც პრეზიდენტის, არც სამოქალაქო სექტორის და არც ავტორიტეტული საერთაშორისო ორგანიზაციების მოსაზრებებსა და შეფასებებს. მმართველი პოლიტიკური ძალა ურყევად დაადგა ხელისუფლების მიტაცების გზას და სურს, უმოკლეს ვადაში გაიმყაროს და დაიმტკიცოს ძალაუფლება. კიდევ ერთხელ გვინდა ხაზგასმით აღვნიშნოთ, რომ წარმოდგენილი ცვლილებების შემოთავაზებული სახით მიღება, ჩიხში შეიყვანს ჩვენს ქვეყანას, რადგან დააშორებს რეალური საპარლამენტო მმართველობის მოდელს, ვერ უზრუნველყოფს მრავალპარტიულ წარმომადგენლობას პარლამენტში, აკრძალავს საქართველოს პრეზიდენტის პირდაპირი წესით არჩევას, შეასუსტებს ადგილობრივ თვითმმართველობას და დაბლა დასწევს ადამიანის უფლებების დღეს არსებულ სტანდარტს, - ნათქვამია განცხადებაში.
ამასთან, „თავისუფალი დემოკრატები“ და "რესპუბლიკური პარტია“ მმართველ პოლიტიკურ ძალას საპარლამენტო განხილვების შეჩერებისკენ მოუწოდებენ.
„დაუშვებელია ქვეყნის მმართველობის მოდელის შეცვლა ასეთ სწრაფ ტემპებში, ამიტომაც, მოვუწოდებთ მმართველ პოლიტიკურ ძალას, შეაჩეროს საპარლამენტო განხილვები და, სულ მცირე, დაელოდოს ვენეციის კომისიის დასკვნას. იმოქმედოს მის მიერვე საჯაროდ გაკეთებული განცხადებების შესაბამისად და ნუ დააყენებს ქვეყნის დემოკრატიულ გავითარებას ეჭქვეშ, რადგან ის იღებს უდიდეს პასუხისმგებლობას ჩვენი ქვეყნის ახლანდელი და მომავალი თაობების წინაშე“, - ნათქვამია განცხადებაში.