ჯანდაცვის მინისტრი დავით სერგეენკო ინფექციური პათოლოგიის, შიდსისა და კლინიკური იმუნოლოგიის ცენტრის თანამშრომლებს პასუხობს.
დავით სერგეენკოს განმარტებით, უნივერსიტეტის მაღლივი კორპუსის ტერიტორიაზე გამოყოფილია სახელმწიფო საკუთრებაში არსებული ჰექტარ ნახევრამდე მიწა, სადაც ინფექციური საავდმყოფო აშენდება. მისი თქმით, ინფექციური პათოლოგიის, შიდსისა და კლინიკური იმუნოლოგიის ცენტრი ამ ახალ შენობაში გადავა.
„ამ ტერიტორიაზე სახელმწიფო ინფექციური საავდმყოფოს აშენებას ვაპირებთ, სადაც შიდსისა და ინფექციურის ცენტრი გადავა. ახლა პოექტირების სტადიაა. იდეალურ შემთხვევაში მშენებლობის დაწყებიდან ორი წლის შემდეგ პაციენტების მიღება შესაძლებელი იქნება. ამიტომ ეს ორი წელი რომ გაუსაძლის პირობებში არ იყვნენ, ჩვენ გვაქვს მოლაპარაკება და ალბათ, პრემიერთან საღამოს შეხვედრაზეც გვექნება საუბარი ამაზე, რომ მოველაპარაკოთ კომპანია ”ავერსს”, რათა მათ მოგვცენ საშუალება ამ პერსონალის განთავსების. ამ სავადმყოფოსთვის თითქმის ნახევარ მილიონს ვიხდით იჯარის სახით და ეს ნახევარი მილიონი შეგვიძლია შედარებით უკეთესი პირობების შექმნას მოვახმაროთ. მე ვფიქრობ ოპტიმალურ გადაწყვეტილებას მივიღებთ“, - განაცხადა დავით სერგეენკომ.
ჯანდაცვის მინისტრის თქმით, სამი წლის წინ ინფექციური საავადმყოფოს თანამშრომლებისთვის სანზონაში ყოფილი კარდიოლოგიის ინსტიტუტის შენობა და ბიუჯეტი გამოყოფილი იყო, თუმცა პროექტი ვერ განხორციელდა.
„შენობის რეკონსტრუქციის დაწყება არ მოხდა, რადგან რამოდენიმე ათეული სოციალურად დაუცველი შეიჭრა და იქ ცხოვრობდა. ცენტრს ვთავაზობდით და დღესაც ვთავაზობთ, რომ მივცემდით იჯარის თანხას და ნებისმიერი სხვა შენობა მოეძებნათ, სანამ ახალი შენობის აშენებამდე ისინი ნორმალურ პირობებში იქნებოდნენ. სამხუხაროდ, შესაბამისი შენობა ვერ მოძებნეს, რომელიც სტანდარტებს დააკმაყოფილებდა“, - განაცხადა სერგეენკომ.
ინფექციური პათოლოგიის, შიდსისა და კლინიკური იმუნოლოგიის თანამშრომლებმა დღეს აქცია გამართეს, სადაც მათთვის შენობის უმოკლეს ვადაში აშენება და სამუშაო პირობების გაუმჯობესება მოითხოვეს.