სერჟანტთა მომზადების ცენტრის კურსების გამოშვება
გიორგი ანწუხელიძის სახელობის სერჟანტთა მომზადების ცენტრში ძირითადი სასწავლო და ოცეულის სერჟანტის შუალედური კურსები დასრულდა. კურსების გამოშვების საზეიმო ცერემონიალი დაბა კოჯორში, სერჟანტთა მომზადების ცენტრის ბაზაზე გაიმართა.
საქართველოს შეიარაღებული ძალების წვრთნებისა და სამხედრო განათლების სარდლობის შტაბის უფროსმა, პოლკოვნიკმა როინ ფაილოძემ და მთავარმა სერჟანტმა კობა ცირეკიძემ კურსდამთავრებულებს სწავლების წარმატებით დასრულება მიულოცეს და წარჩინებულ მსმენელებს სერტიფიკატები პირადად გადასცეს.
ძირითადი სასწავლო - ათეულის მეთაურის კურსი სამი თვე მიმდინარეობდა და მასში 75 მსმენელი მონაწილეობდა. კურსის განმავლობაში სამხედრო მოსამსახურეებმა პირად შემადგენლობასთან მეცადინეობის ჩატარების მეთოდიკა, სხვადასხვა სამხედრო წესდებები, სასწავლო სროლების ჩატარების მეთოდიკა, ზოგადი სამედიცინო მომზადება, ტაქტიკური ნიშნები, ათეულის დონეზე ტაქტიკური მომზადება, ქვედანაყოფის მართვის პროცედურები, ქვეითთა საბრძოლო ვარჯიშები, ლიდერობა და სხვა ზოგადი საგნები შეისწავლეს.
31-მა კურსანტმა ოცეულის სერჟანტის შუალედურ კურსზე, ტაქტიკური ნიშნები, ტაქტიკური დავალებები, ტაქტიკის საფუძვლები, თავდაცვითი და თავდასხმითი ოპერაციები, სხვადახვა თემაზე სამხედრო ბრძოლის ისტორიები, უზრუნველყოფისა და შეიარაღების სერჟანტის ფუნქციები და მოვალეობები, ასევე ფსიქოლოგიური სემინარები სხვადასხვა თემებზე და ქვედანაყოფის მართვის პროცედურები სრულად შეისწავლა.
ორივე კურსის განმავლობაში მსმენელებს ფიზიკური მომზადება და 10-15 კმ-იან დისტანციაზე მარშ-ნახტომები ჩაუტარდათ.