შს სამინისტრო დამოუკიდებლობის დღეს თელავში აღნიშნავს. საგზაო მოძრაობის უსაფრთხოების კამპანიის - „შენი გულისთვის, შენი უსაფრთხოების“ ფარგლებში ერეკლე მეორის გამზირზე იმიტირებული ქალაქია მოწყობილი.
სპეციალურად ამ დღისთვის შექმნილმა ინფრატრუქტურამ სტუმრებს თავი რეალურ უსაფრთხო ქალაქში უნდა აგრძნობინოს.
სივრცეში მთელი დღის განმავლობაში მრავალფეროვანი გასართობი პროგრამები იქნება წარმოდგენილი:
იმიტირებულ „კოსმოსურ ხომალდში“ „112“-ის ოპერატორები ბავშვებს სპეციალურად მათთვის შექმნილ კომპიუტერულ თამაშებს შესთავაზებენ. ველოსიპედის მართვის უფლების მოსაპოვებლად ბავშვებს სახალისო თეორიული და პრაქტიკული გამოცდები ჩაუტარებათ.
ისტორიული ფილმების მოყვარულებისთვის კი ღია ცის ქვეშ უწყების არქივში დაცული უნიკალური ფილმების ჩვენება გაიმართება. დაგეგმილია კონცერტები, გამოფენები, სხვადასხვა სახის გასართობი შეჯიბრებები და კონკურსები.
ქალაქში მისულ სტუმრებს მეხანძრე-მაშველები და საპატრულო პოლიციის თანამშრომლები პირადად უმასპინძლებენ.