„ქართული მიწის დაცვის ჯგუფი“ მმართველ გუნდს ულტიმატუმს უყენებს და ხელისუფლებას სპეციალური განცხადებით მიმართავს. როგორც ჯგუფის წევრები ამბობენ, თუ 27 მაისამდე საკონსტიტუციო ცვლილებების პროექტში უცხო ქვეყნის მოქალაქეებზე მიწების გასხვისების აკრძალვის ნორმა არ ჩაიდება, ისინი შიმშილობას დაიწყებენ და დაუმორჩილებლობის აქციას გამართავენ, რაც მათივე განმარტებით, პარლამენტის შენობის პიკეტირებას გულისხმობს. ამის შესახებ გია კორკოტაშვილმა და სანდრო ბრეგაძემ პრესკონფერენციაზე განაცხადეს.

მათივე ინფორმაციით, „ქართული მიწის დაცვის ჯგუფი“ 600-მდე ადამიანს აერთიანებს და აქედან 100-მდე მოქალაქე შიმშლობის დასაწყებად უკვე მზად არის.

„მოგეხსენებათ, რომ საქართველოს მოსახლეობის აბსოლუტური უმრავლესობა მომხრეა, რომ ქართული მიწის უცხოელებზე მიყიდვა აიკრძალოს.

სამწუხაროდ, საქართველოს კონსტიტუციის ახალ რედაქციაში არ არის გათვალისწინებული მუხლი, რომელიც უცხოელებისთვის მიწის მიყიდვას აკრძალავს, რაც წარმოადგენს ქართველი ხალხის ნების უგულვებელყოფას.

ამავე დროს დიდია საშიშროება, რომ უცხოელებისთვის მიწის მიყიდვის დაკანონებამ გამოიწვიოს ქვეყნის დემოგრაფიული მდგომარეობის შეცვლა, რაც წარმოადგენს კატასტროფის ტოლფას საფრთხეს ქართული სახელმწიფოებრიობისათვის.

ქართული მიწის დაცვის ჯგუფი მოგამრთავთ ხელისუფალთ, რომ სასწრაფო წესით გაითვალისწინეთ ხალხის მოთხოვნა და კონსტიტუციაში ასახეთ ქართული მიწის უცხოელებზე გაყიდვის აკრძალვა.

ჩვენი მოთხოვნაა, რომ ყოვილივე განხორციელდეს 27 მაისამდე.

წინააღმდეგ შემთხვევაში ასეულობით საქართველოს მოქალაქე გამოვაცხადებთ უვადო, მასობრივ შიმშილობას და მოვუწოდებთ მთელ საქართველოს დაუმორჩილებლობისაკენ.

ვიტოვებთ იმედს, რომ ხელისუფლებას ეყოფა კეთილგონიერება, არ მიიყვანს პროცესებს უკიდურეს გამწვავებამდე და აღასრულებს ქართველი ხალხის ნება-სურვილს“, - ნათქვამია ჯგუფის განცხადებაში.