ცხინვალში წარმოთქმული მისალოცი ტექსტის გამო, ევროკავშირის სპეციალურ წარმომადგენელს, შესაძლოა, მანდატის ვადაზე ადრე დატოვება მოუხდეს.
ოპოზიცია ხელისუფლებას მოუწოდებს, ბრიუსელს გერმანელი დიპლომატის გაწვევა მოსთხოვოს.
ცხინვალიდან სოხუმში წასული ჰერბერტ ზალბერი ხვალ თბილისში ჩამოდის. სავარაუდოდ, დიპლომატი სწორედ ხვალ განმარტავს, რატომ მიულოცა სამხრეთ ოსეთის დე ფაქტო პრეზიდენტს ე.წ. არჩევნებში გამარჯვება.
ეს არ არის პირველი შემთხვევა, როდესაც ჟენევის მოლაპარაკებების თანათავმჯდომარეს საკუთარი განცხადების გამო განმარტების გაკეთება უწევს. მწვავე რეაქციები და არაერთგვაროვანი ინტერპრეტაციები მოჰყვა ორი წლის წინ დიპლომატის მიერ სოხუმში ნათქვამ ფრაზასაც.
თავის დროზე კრიტიკის ობიექტი გახდა ზალბერის წინამორბედიც. მეორე დღეა, ოფიციალური თბილისი ბრიუსელის რეაგირებას ელის.