აჭარა არის ჩვენი განმანათლებელი, ჩვენი პირველი ქრისტიანები სწორედ აჭარაში ეწამნენ – ეს უწმინდესის სიტყვებია რომელიც მან ქადაგებისას წარმოთქვა.
ილია მეორემ აჭარაში მცხოვრებთა ძლიერ რწმენაზე გაამახვილა ყურადღება.
საქართველოს კათოლიკოს-პატრიარქმა სიონის ღვთისმშობლის მიძინების სახელობის ტაძარში დღეს პარაკლისი გადაიხადა.
მართლმადიდებელი ეკლესია წმინდა მოციქულ ანდრია პირველწოდებულის ხსენების დღეს აღნიშნავს.
სახარების მიხედვით, წმინდა მოციქული ანდრია პირველწოდებული წმინდა პეტრე მოციქულის ძმა იყო. უფალმა მოციქულთა შორის პირველად ანდრიას მოუწოდა. ამიტომაც მას პირველწოდებული ეწოდა.
საქართველოში წამოსვლამდე წმ. ანდრიას ღვთისმშობელმა ამცნო, რომ მის წილხვედრ ქვეყანაში უნდა ექადაგა.
წმინდა მოციქული პირველად ქართლის ტერიტორიაზე, დიდაჭარაში შემოვიდა. მას თან ყოვლადწმინდა ღვთისმშობლის მიერ ბოძებული ხელთუქმნელი ღვთისმშობლის ხატი ჰქონდა.