ტყიბულში ტრაგედიის შემდეგ მთავრობა კანონში შესული ცვლილების ამოქმედებას აღარ ელოდება და მაღალი რისკის შემცველი საწარმოების მონიტორინგის მიზნით, სპეციალურ კომისიებს ქმნის.
ეკონომიკის და ჯანდაცვის მინისტრების გადაწყვეტილება უკვე ძალაშია. მონიტორინგის ჯგუფი ეკონომიკის სამინისტროს სამშენებლო ზედამხედველობის სააგენტოს და ჯანდაცვის სამინისტროს შრომის პირობების ინსპექტირების დეპარტამენტის სპეციალისტებით დაკომპლექტდება.
გაფრთხილების გარეშე მონიტორები ობიექტების შემოწმებას უახლოეს პერიოდში დაიწყებენ. მონიტორინგი ჩატარდება მაღაროებში, შახტებში და სამშენებლო ობიექტებზე. უსაფრთხოების ნორმების დარღვევის შემთხვევაში სანქციები გაიცემა.
მონიტორინგის ჯგუფის შექმნა დროებითი მექანიზმია. უახლოეს პერიოდში ამოქმედდება ჯანდაცვის სამინისტროში მომზადებული კანონპროექტი, რომლის მიხედვით, შრომითი ინსპექციის უფლებამოსილება იზრდება.