საზოგადოებრივი მაუწყებელი, 31 მაისიდან 18 ივნისის ჩათვლით, რაგბიში 20-წლამდელთა მსოფლიო ჩემპიონატის ყველა მატჩს პირდაპირ ეთერში ექსკლუზიურად შემოგთავაზებთ. ჩემპიონატის 30-ვე მატჩის ტელეტრანსლაციას საზოგადოებრივი მაუწყებელი თბილისისა და ქუთაისის სტადიონებიდან წარმოგიდგენთ.

რაგბიში 20-წლამდელთა მსოფლიო ჩემპიონატი რანგით მეორე დონის ტურნირია, რომელსაც წელს საქართველო მასპინძლობს. 2017 წლის მსოფლიო ჩემპიონატზე 12 საუკეთესო გუნდს შორის საქართველოს ნაკრებიც იასპარეზებს.

საზოგადოებრივი მაუწყებელი მოლაპარაკებებს აწარმოებს 2019 წლის რაგბის მსოფლიო ჩემპიონატის ექსკლუზიურ ჩვენებაზეც. ჩემპიონატი იაპონიაში ჩატარდება, მასში 20 ნაკრები მიიღებს მონაწილეობას, მათ შორის საქართველოც.

ქართველი ბორჯღალოსნებისთვის ეს ზედიზედ მეხუთე მსოფლიო ჩემპიონატი იქნება.

ქართველი მორაგბეები D ჯგუფში ავსტრალიისა და უელსის ნაკრებებთან ერთად იასპარეზებენ. მესამე მეტოქის ვინაობა რეგიონული საკვალიფიკაციო ტურნირების დასრულების შემდეგ გაირკვევა. ოკეანეთი 1-დან ქართველი სპორტსმენები სავარაუდოდ ფიჯის ან სამოას ნაკრებს დაუპირისპირდებიან, ამერიკა 2-დან - კანადას ან აშშ-ს.