პირველად ხუთი წლის განმავლობაში, "ტოიოტას" მოგება შეუმცირდა. კომპანიის ცნობით, 2016-2017 წლის ფისკალურ წელიწადში, რომელიც 31 მარტს დასრულდა, მოგებამ 1,83 ტრილიონი იენი შეადგინა, რაც წინა ფისკალურ წელთან შედარებით, 21-პროცენტიან ვარდნას ნიშნავს.

ერთ-ერთ მთავარ მიზეზად, "ტოიოტა" იენის გამყარებას ასახელებს, რადგან, კომპანიის განცხადებით, გაყიდვები წლიურ დონეზე 10,19 მილიონი ერთეულიდან 10,25-მდე გაიზარდა.

იაპონური ვალუტის გამყარების გამო, "ტოიოტა" მომავალ წელს მოგების 1,5 ტრილიონ იენამდე შემცირებას ელოდება. კომპანიის გაყიდვები შემცირდა ჩრდილოეთ ამერიკაში, თუმცა, გაიზარდა ევროპის, იაპონიისა და აზიის ბაზრებზე.