აშშ-ისა და რუსეთის პრეზიდენტების შეხვედრა დიდი ოცეულის სამიტზე ივლისში შედგება - ამის შესახებ ჟურნალისტებს რუსეთის საგარეო საქმეთა მინისტრმა სერგეი ლავროვმა ამერიკის პრეზიდენტთან დონალდ ტრამპთან შეხვედრის შემდეგ განაცხადა.
აშშ-ში პრეზიდენტ დონალდ ტრამპისა და რუსეთის საგარეო საქმეთა მინისტრის შეხვედრა ცოტა ხნის წინ დასრულდა. სირიის სამოქალაქო ომი და უსაფრთხოების ზონების შექმნის საკითხი, ასევე ბარაქ ობამას პრეზიდენტობის დროს გაძევებული რუსი დიპლომატების კუთვნილი დოკუმენტების დაბრუნება იყო განხილვის მთავარი თემა თეთრ სახლში.
შეხვედრის დასრულების შემდეგ, რუსეთის საგარეო უწყების ხელმძღვანელმა პრესკონფერენციაზე კითხვებს უპასუხა. სერგეი ლავროვის თქმით, ტრამპის ადმინისტრაცია საქმეზე ორინეტირებული ხალხითაა დაკომპლექტებული და ისინი იდეოლოგიური ტენდენციებისგან თავისუფლები არიან. რუსი დიპლომატის განცხადებით, აშშ-სა და რუსეთის პრეზიდენტების შეხვედრა დიდი ოცეულის სამიტზე ივლისში შედგება.
ლავროვმა ასევე აღნიშნა, რომ პრეზიდენტი ტრამპი კონსტრუქციული ურთიერთობების მომხრეა. პრესკონფერენციაზე სერგეი ლავროვს აშშ-ის საპრეზიდენტო არჩევნებში რუსეთის შესაძლო ჩარევასა და სანქციებზე დაუსვეს კითხვები.