ავჭალაში, ანდრონიკაშვილის პირველი შესახვევის მცხოვრებლები მათი სახლების მიმდებარე ტერიტორიაზე დაგეგმილი ცხრასართულიანი კორპუსის მშენებლობას აპროტესტებენ.
როგორც „მოამბესთან“ ინტერვიუში ადგილობრივები აცხადებენ, მიწის ნაკვეთი, რომელიც ახლა შემოღობილია, დაახლოებით, სამი წლის წინ გაიყიდა, თუმცა მეპატრონე მაშინ ტერიტორიაზე კერძო სახლის მშენებლობას გეგმავდა.
მათივე თქმით, რამდენიმე დღის წინ, ღობეზე აბრა გააკრეს, სადაც წერია, რომ აღნიშნულ ადგილზე ცხრასართულიანი კორპუსის მშენებლობა იგეგმება. ადგილობრივები ამბობენ, რომ ისინი მაღალსართულიანი კორპუსის მშენებლობას არ დაუშვებენ. მათ შესაბამისი განცხადებით მერიასა და საკრებულოს უკვე მიმართეს და მათგან შესაბამის პასუხს ელოდებიან.
აქციის მონაწილეების მტკიცებით, აღნიშნულ ტერიტორიაზე კორპუსის მშენებლობა კერძო სახლებს საფრთხეს შეუქმნის.