სან ანტონიო სფერსმა დასავლეთ კონფერენციის ნახევარფინალურ სერიაში ჰიუსტონ როკეტსთან ანგარიში გაათანაბრა.

გრეგ პოპოვიჩის გუნდმა საკუთარ ეითი ენდ თი ცენტრში გამართულ მეორე მატჩში მეტოქე დიდი სხვაობით, ანგარიშით 121-96 დაამარცხა.

მასპინძლებმა უპირატესობა თავიდანვე მოიპოვეს, რომელიც მთელი თამაშის მანძილზე მეთოდურად განავითარეს.

სფერსში მორიგი ბრწყინვალე შეხვედრა ჩაატარა კავაი ლეონარდმა, რომელმაც გუნდს 34 ქულა, 8 პასი და 7 მოხსნა შესძინა. სტუმართა შორის რაიან ანდერსონი გახლდათ საუკეთესო 18 ქულით.

უჩვეულოდ პასიური იყო როკეტსის ლიდერი ჯეიმს ჰარდენი, რომელმაც მხოლოდ 13 ქულა მიითვალა აქტივში. ამ წყვილის სერია ჰიუსტონში გადაინაცვლებს და მომდევნო ორი დაპირისპირება ტოიოტა ცენტრში შედგება.

გუშინვე, აღმოსავლეთ კონფერენციაში კლივლენდ კავალიერსმა მეორე თამაშშიც დაამარცხა ტორონტო რეპტორზი და სერიაში 2-0 დაწინაურდა.