გარემოსა და ბუნებრივი რესურსების დაცვის სამინისტროსა და გაეროს გარემოსდაცვითი პროგრამის (UNEP) ორგანიზებით უსაფრთხო და სუფთა წარმოების შესახებ სამუშაო შეხვედრა გაიმართა. შეხვედრის მონაწილეებს მინისტრის მოადგილემ ეკატერინე გრიგალავამ და გაეროს გარემოსდაცვითი პროგრამის წარმომადგენელმა ნინა შნაიდერმა მიმართეს. ტრენინგის ძირითადი მიზანია რესურს-ეფექტური და სუფთა წარმოების ხელშეწყობა და ეკო-ინოვაციების პოპულარიზაცია საქართველოში. შეხვედრაზე UNEP-ის მიერ შემუშავებული მიდგომები და ინსტრუმენტები განიხილეს, რომლებიც მიმართულია მცირე და საშუალო ზომის კომპანიების დასახმარებლად, რათა მოახდინონ ქიმიური მომწამლავი ნივთიერებების იდენტიფიცირება და მათთან დაკავშირებული გარემოსდაცვითი, სოციალური და ეკონომიკური რისკების შემცირება. მონაწილეებმა ინფორმაცია ეკო-ინოვაციური მიდგომის შესახებ მიიღეს, რაც მიზნად ისახავს მდგრადობის პრინციპის დანერგვას ბიზნეს საქმიანობის წარმართვისას. მდგრადი ბიზნეს სტრატეგიის, ეკო-ინოვაციის ჩამოყალიბება და დანერგვა, სამომავლოდ კომპანიის საქმიანობაზე დადებითად აისახება და გაზრდის მის კონკურენტუნარიანობას. შეხვედრა ევროკავშირის მიერ დაფინანსებული პროგრამის “მწვანე ეკონომიკის ხელშეწყობა აღმოსავლეთ პარტნიორობის ქვეყნებში” (EaP Green) ფარგლებში, გარემოსდაცვითი ინფორმაციისა და განათლების ცენტრის ორგანიზებით გაიმართა, რომელსაც სახელმწიფო უწყებებისა და კერძო სექტორის, არასათავრობო ორგანიზაციების წარმომადგენლები და დამოუკიდებელი ექსპერტები ესწრებოდნენ.