ხვალ ლონდონში წლის მთავარი საკრივო ორთაბრძოლა გაიმართება. აი-ბი-ეფის ვერსიით, საჩემპიონო ქამარზე ერთმანეთს უკარინელი ვლადიმერ კლიჩკო და ბრიტანელი ენტონი ჯოშუა დაუპირისპირდებიან.

პარალელურად წბა-ს ვაკანტური ტიტულიც გათამაშდება. აღსანიშნავია, რომ აღნიშნულმა ორთაბრძოლამ უპრეცედენტოდ დიდი ინტერესი გამოიწვია.

ლეგენდარულ უემბლის სტადიონზე 90 ათას გულშემატკივარს ელოდებიან. შეგახსნებთ, რომ ჯოშუა აი-ბი-ეფის ქამრის მოქმედი მფლობელია.

ინგლისელმა მოკრივემ შარშან ამერიკელი ჩარლზ მარტინი ნოკაუტით დაამარცხა. სულ კი 27 წლის ენტონი ჯოშუამ, კარიერაში 18-დან 18 დაპირისპირება მოიგო და ყველა ვადაზე ადრე დაასრულა.

41 წლის კლიჩკო, 2015 წლის ნოემბრის შემდეგ რინგზე არ გასულა, ბოლოს მან ტაისონ ფიურისთან წააგო. კლიჩკოს 68 ჩატარებული დაპირისპირებიდან 64 გამარჯვება აქვს მოპოვებული. ხვალინდელი სუპერ შეხვედრა, თბილისის დროით ღამის პირველ საათზე დაიწყება.