სახელმწიფო უსაფრთოხების სამსახურში აცხადებენ, რომ ზუგდიდის რაიონის სოფელ ხურჩაში მომხდარ ფაქტზე სუს-ი რეაგირებას მოახდენს და ინფორმაციას მიიღებს ყველა შესაბამისი საერთაშორისო ორგანიზაცია.
როგორც საზოგადოებრივს სუს-ში განუცხადეს, სოფელ ხურჩასთან საოკუპაციო ხაზი არ გადმოწეულა, ბოძები ჩასმულია საოკუპაციო ხაზზე, რაც ბორდერიზაციის პროცესის გაგრძელებაა.
„საოკუპაციო ხაზის გადმოწევა არ მომხდარა, ბოძები ჩასმულია საოკუპაციო ზოლზე. ეს არის ბორდერიზაციის პროცესის გაგრძელება და სახელმწიფო უსაფრთხოების სამსახური ამ ფაქტზე მოახდენს რეაგირებას, ისევე - როგორც ყველა შესაბამისი უწყება ყველა დონეზე.
ინფორმაცია უკვე გადაეცა ევროკავშირის სადამკვირვებლო მისიას, მათი დამკვირვებლები იმყოფებოდნენ ადგილზე. საქართველოს ცენტრალური ხელისუფლება ინფორმაციას მიაწოდებს ყველა საერთაშორისო ორგანიზაციას, რომლებიც მუშაობენ ამ საკითხებზე“,-ნათქვამია სუს-ის ინფორმაციაში.
ზუგდიდის სოფელ ხურჩაში, რომელიც გალის რაიონის სოფელ ნაბაკევს ესაზღვრება, რუსმა სამხედროებმა საოკუპაციო საზღვართან ღობე გაავლეს. შედეგად, ხურჩელი ომარ მიქაუტაძისა და არველოდ ნაჭყებიას ორ ჰექტრამდე სასოფლო-სამეურნეო მიწის ნაკვეთი ოკუპირებულ ტერიტორიაზე მოხვდა. როგორც ადგილობრივები აცხადებენ, რუსმა სამხედროებმა სიმინდის ყანებს ხის ბოძები უკვე შემოავლეს.