სამხრეთ-აღმოსავლეთ აზიის ქვეყნების (ASEAN) საგარეო საქმეთა მინისტრების სამიტი მანილაში ხმაურის ფონზე გაიმართა. 300-მდე მოქალაქემ ამერიკის შეერთებული შტატების საელჩოსთან მოიყარა თავი, სადაც ისინი ვაშინგტონს სამხრეთ-აღმოსავლეთ აზიის ქვეყნების პოლიტიკაში ჩაურევლობისკენ მოუწოდებდნენ. სამიტის დასრულების შემდეგ კი დოკუმენტი გამოქვეყნდა. საგანგებო განცხადებაში წერია, რომ სამიტის მონაწილე წევრი ქვეყნები ჩრდილოეთ კორეას მოუწოდებენ, დაემორჩილოს გაეროს სანქციებს და რეგიონში მშვიდობის შენარჩუნების მიზნით საერთაშორისო სამართლის ნორმებს პატივი სცეს.
ამერიკის შეერთებულმა შტატებმა ოფიციალური ფხენიანისთვის სანქციების გამკაცრება დააანონსა. საერთაშორისო სააგენტო “როიტერთან” ინტერვიუში პრეზიდენტმა დონალდ ტრამპმა განაცხადა, რომ ფხენიანთან მასშტაბურ კონფლიქტს არ გამორიცხავს, თუმცა ვაშინგტონი უპირატესობას საკითხის დიპლომატიური გზით გადაჭრას ანიჭებს.